生涯(12) 堅城建築1975/01/10,麥章記1975/5/1.

1975年1月8日拿了26天工資,離開福利建築。

過兩天1976年1月10日，大佬人情下,加插個職位落個地盤，名稱叫木雜，叫做比地盤雜工好些，叫做有些技能，地盤在官塘，興建地利亞修女紀念學校，公司堅成建築，散工日薪27元，行船好過彎，好過無嘢做。

木雜做吓啲臨時設施，釘吓圍欄加固吓其他之類，一做就做咗三個月零九日，就辭職無做。

三個多月來稍為深刻事？記得初來時，地盤還在地基，扎鉄判頭周三記，打柱頭鉄(鋼根)修正柱頭鋼根，要擒高個人用力來拉，誰知鋼根斷咗，整個人跌下來，元寶一樣送入醫院，不過無事，回來後就中正爆大冷孖T。

又佢個仔，成日偷我啲工具用，工具箱都撬爛，谷鬼氣，把我太古時自制，極鋒利木鏧，矛一樣支支向上，結果條友一手血。

有日返工，官塘下車後肚痛，從未如此肚痛過，頗長路程，一路捱回地盤。

做咗三個月零十九日，1975年4月29日就辭工無做。

離開後過幾日，1975年5月1日，大佬介紹下，去咗間叫麥章記裝飾傢俬，跑馬地在興建馬會大樓，麥章記係木器承判商，散工日薪33元，返工有度好，屋企行幾步便到。

做木來講我叫做半桶水，做的下欄居多，鑽吓墻0隆搬吓料之類，就係咁一做四個月零五日，1975年9月6日止。

難忘的

最欣賞條學師仔，年紀輕輕一件4X8尺，6分厚大甲板，一個人放舞上鋸床開料，手快腳快，運作自如。

地盤終於接近完工，有日驗消防，地盤要清理一切，由其通道，明天就要停工。

停工日早上，諗起自己有扎門封口線，還放在𨋢旁？大鑊驗消防？還是過不到自己，返回地盤放妥，才安樂。

有日返工行出天樂里，南洋戲院過些巴士站，有個學生仔係咁跑，結果一跌趴地，係咁抽搐，我又趕返工，我就嗱淋拉個站長來，叫佢叫救護車。

又有次出差，去到另地盤中環，都爹利街，煤氣燈石階左則一地盤，地盤入口剛好石階平台位，

有日有條電氣工人，在地盤內人字梯上線槽工作，突然暈倒，地盤工人便送佢去就近港中醫院，

誰知私家醫院唔收，再送去公立醫院，結果就咁走咗，地盤內留下張梯，1支羅絲批，還斜斜地豎在線槽上。

1975年9月6日離開麥章記。

生涯(11下)福利建築公司1973/07/21~1975/01/08。

回想在福利南區維修，一年多來工作，發生好多事，時間排序就無辦法？為有想到乜就寫乜？

工友傾得埋就水喉工屎坑成，屎坑成住灣仔道，克街附近三層高舊樓二樓，我就住霎西街，距離唔太遠，衰鬼買有部90仔電單車，馬力細，週時踫啱遇啱，就載埋返放工，路程走的新開南風道，有次放工南風道上斜，佢又瘦又輕 ，係咁叫我坐埋啲，原來我身重車前轆輕趌起。

90仔二手車，有次司徒拔道落山斜斷鍊，空波流落到皇后大道東，鄧𦘦堅醫院則邊行梯，兩條友扶頭扶尾，落樓梯推回家。

做工方面最記得？香港仔弱智兒童院，屎坑成換水喉，在院外手動水喉絞牙，院內有條弱兒不停哋唱同一句話，啦喇罅拿喇啦喇，而屎坑成就接著同樣啦喇罅拿喇啦喇，就係咁兩人慣性，不停哋你一句我一句，由開工唱到收工。

講起弱智兒童，有次學堂，警察招待一班弱智兒童，有男有女，有個男的竟然用粒糖引誘個女仔，比佢鍚啖，哈！低低哋都懂溝女。

建造業

有日來了三個建造業學徒，泥水，木工，水喉，水喉叫司徒和，大泡和，木工花名叫金貴祥，當時有套外國劇功夫好hit，主角叫金貴祥，多咗幾條靚仔當然好玩，由其份蛇王工，周時相約工作地點鋤大D，鋤到烏天地暗，有時成班走去深水灣游水，結果沙灘上鋤大D，鋤到水都無落，就各自放工返歸。

泥水仔

有次差點玩出人命，條泥水仔我箍住佢個頭，叫佢就範，衰嘢可能箍到出不到聲？差點箍C佢，自此我都不敢玩得過份。

警察學堂

學堂個山好多蛇，周時返工一早，見有被打C啲蛇，攤響宿舍地下。架步面對宿舍，宿舍週時因晾衫滴水罵戰，當差啲女人非一般，搣蝦拆蟹就梗，罵到日日洗床單，你晚晚都嚟架咩？

宿舍有單工程，由於廁所係木門，設計在露台，風吹雨打，沖涼弄濕，日子有功就門腳枯爛，由於政府撥錢有限，無得更換，管工余章一聲號令，通通爛的cut走佢，結果隻隻門街外望上去，乜都睇晒，被班C九投訴大罵，後來還是續隻接駁加番長，才平息件事。

修門期間遇到森伯，森伯以前在灣仔藍屋對面，開設單車租賃，森記單車，細路時租單車，學踩單車大，週時租單車過時，被佢搣兩吓面珠就算，個女嫁個差佬，退休後跟隨個女住宿舍喎？

當年612水災森記單車。

學堂又遇過陳欣健，似乎係教官，跟住班學警指指點點比分數，又見過劉天𧶽似乎在拍戲，又見過大熱天時學警檢閱，一個個中暑慣低。每逢接到警察部門柯打，第一時間就接觸沙展巴叻，而宿舍位巴叻好好傾，大講當時年暴動，如何招乎班左仔。

而我們架步有個雜工，就住對面警察宿舍，大佬係藍帽子，我哋因利成便，週時在佢家打麻雀，久而久之佢個妹，幾次我收工同佢同一巴士？後來才發覺佢對我有意思，女追男隔層紙，男的就來者不拒，睇戲不在話下，她還主動帶我去爆房，似乎老手熟晒架步，銅鑼灣一時鐘公寓，就咁發生咗LU？還不時來電傾偈，還說同未婚夫一起？嗰時我有點驚，驚佢未婚夫，驚佢做雜工個大佬，藍帽子個大佬？還好平安渡過，結婚還請我飲？我都忘記有沒有去。

架步火燭

所謂木屋架步寫字樓，有日返工到步，見到看更坐在路邊，原來昨晚火燭，一把火燒掉整個木搭寫字樓，後來搬咗落去黃竹坑道一地鋪位，如常辦公。

公廁王

有次維修香港仔大道一公廁,廁所佬間房，真誇張，掛有6,7張大頭照，大大張排掛在墻上，全部四方帽照，係佢啲仔來喎？真係羡慕C人。

遊艇

又有日我同一個木工叫余勤，被派工去銅鑼灣避風塘,替艘老爺遊艇修葺，隻艇太殘兩個人有排做？隻艇係睇工程班政府人員，二手買來的，擺明公司免費幫佢修葺？日日返工，就不用返黃竹坑，直接來這裡銅鑼灣避風塘，乘街渡上遊艇開工，主要修番好房口木器，兩人做漫長日子，工具都跌唔少落海，無聊有時就𥄫吓女，街渡開出開入，靚女就企響街渡船頭，文風不動，風吹秀髮，自然眼甘甘，視覺享受，睇開就睇，竟然有個相熟大媽同我講？取水面人做老婆，要好多錢又要乜又要勿喎？心諗睇靚女啫？

有次對姊弟經常上來玩，捉衣因週圍走?比我發現個細的，在船旁邊，面青青的在水撐吓撐吓？我一手秤番佢上來。

摩星嶺 政治營

有次接柯打，摩星嶺政冶營，政治營挨山而建，自然梯級多，入到去做嘢就會有個便裝跟住，有次做監倉,倉個個獨立，三便墻一隻門，三便墻有貓眼，同住宅大門啲防盜眼無分別，正面就係門，有個鐵窗用來送飯，我就係做鐵窗口嗰件木板，聽便裝講暴動嗰年，傅奇石慧都曾困過這裡喎？

一路做到最底層，有點恐怖？層層一樣獨立，三面貓眼，獨係幾間內裡全粉紅色？問吓個便裝？就話做就做啦？後來才知話係死囚喎？真定假就唔知啦？總知顏色恐怖。

又聽過個沙展巴叻講鬼故，話當值有晚聽到操兵聲，抗戰時加拿大兵守這裡，聽見操兵聲突然變咗單人操聲，跟住就聽見殊殊聲喎？大概係鬼笑話啩？

又話有日同老婆睇完戲出來，見到幾條欄河飛撩女，佢話咪攪嗱淋同老婆閃喎？

最經典有次，在筲箕灣見到個垃圾佬推住手推車，條友就是政治營見過位伙記，大概執行任務掛？

難忘事記得就咁多。

1975年1月8日

生涯(11上)搬遷，福利建築公司1973/07/21~1975/01/08。

搬遷

還未離開太古，家住地波斯富街，業主要收回自住，無奈一家要搬，搬咗去無遠霎西街，剛好電車廠另一邊，以前夜晚聽住電車回廠，如今晨早聽住電車出廠聲。

住屋困難，由400尺租金400元，搬到租金600元住既100多尺地方，簡直兩極端。

大佬剛結婚，連我們一家6口，擠在百多尺地方，工作又困難，跟住不久我又告失業，簡直難上加難。

住其間經常與葉德嫻同聶,還有鄭康業，兩人同住樓上，葉德嫻好靚女，嬌小玲瓏，周時就樓下篤魚蛋，當時兩個知名度剛開始。

言歸正傳

1973/07/02離開太古船塢，拿住3千多元遣散費，都不知如何是好，孱仔角建議買金喎？咁就周生生買了三粒金扣，後來金價升，諗住賣回過周生生，誰知個價重低過其他金鋪，於是乎土瓜灣一金鋪賣了。

失業19天，老豆介紹下一位余章世叔，去到間福利建築公司，公司係政府物業維修合約承判商，戰後政府工程，非福利莫屬，余章係港島南區管工。

1973/07/21就正式開工，當日拿住幾件架生在上環，正準備搭7號巴士入香港仔，誰知報紙一看，新聞李小龍歸西？心諗宣傳掛？原來堅的。

維修架步，係間小小自搭木屋,就在黃竹坑警察學校門口，同警察已婚宿舍隔條馬路 ，木工日薪30元，長散工，返就有唔返就無，星期日休息。

維修保養不外乎四行人，木器，泥水，水喉，鉄器，我當然係木器，所做的都係修補換，無難度，泥水一樣,水喉就複雜啲，裝，嵌，換，洗水缸，通渠，通大馬路大沙井大渠。

南區相當大,遠到南面赤柱，西去到摩星嶺，

主管一個余章，一個幫手李先生，當時木工大約4個人，泥水工兩個,鉄器工大細各1，水喉大細工約6個，還有部貨車,司機譚國森同幾個雜工。

司機譚國森好早便認識，細路時華仁書院小童羣益會一起踢波，佢踢波好叻，一個扭十個。

政府屋宇維修工，人工就少啲，但好好做，早上返到去等柯打，收到柯打各自搭車開工，所做的包括有警察學堂，政府員工宿舍，差館，公廁，監獄，診所，學校，弱兒院，所有南區政府物業，大工程就外判。

木工來講多數細微工程，修補吓木門，爛舊木窗門，換把鎖，黐回三幾件木地板，大點工程，換隻門裝把鎖之類，拿住一兩張柯打，搞掂就鬆人，返歸又一天。

就係咁一做就一年半，1975/01/08就玩完，起初解僱7日通知算，後來爭取下，僱傭條例補回26天工資，就咁結束了福利政府南區維修生涯。

一年半以來工作，都係蛇多過做，遇著個水喉工屎坑成，又幾個建造業學徒，又男女關係，又工作上所見所聞所遇，又係一個好不同經歷。

編幅過長，下回再續。

生涯(10)太古船塢1970/03/07~1973/07/02

1970年,建築業低潮,而雲石裝嵌亦時有時無工開,家姐是車手套的,間廠就在筲箕灣亞公岩尾尾,筲箕灣無嘢多,金鋪多船廠多,而家姐位工友老公係做漁船,在太古船塢木工部做工頭,俗稱蛇頭,就係咁介紹下,入咗太古船塢.

1970年3月7日,就入咗太古船塢,一間叫福安木工部做,日薪17元,每日有補水,星期日有工開就雙工,有輪夜通宵班,人工高好多.

木工分傢俬部同木工部,傢俬部顧名思義傢俬,房口幼細木器,木工就船上所有粗木器,如船面甲板,船倉內貨物防撞木枋,到極深到船底錨鍊柜底幾件厚木板,碼頭防撞的大大條木根.

而公司福安更加乜都接來做?連鐵器繩索鈎嘜位,銹蝕到梗咗纜轆都做?到新船下水都做.

當年所住地方,銅鑼灣斯波街62號六樓,每朝叮叮落西灣河,就近餐室早餐,然後船塢響號,8點鐘就開閘,工人就如貫入閘開工,各行走各行入閘位,拿自己號碼牌仔,記得我好似係2525?拿了牌仔,就行無舞雷公遠自己廠房,掛上牌仔箱,就正式開工.

廠房好遠,差不多廠頭行到廠尾,掛上牌仔後就返回自己locker,等蛇頭派工,派工後拿所需工具,便出船工作.

太古船塢就係咁一做,就做咗三年三個月零廿五日,1973年7月2日,太古發展地產,船塢同黃埔船塢合併,全部工人遣散,三年幾年資下,執番幾千元遣散費,就此結束太古船塢生涯.

放工離閘情景

太古船塢三年幾生涯,經歷很多事情,見識過,驚險過,傷心過,開心過.

雞仔

記得初來步到,乜都唔知?九叔蛇頭交帶落就靠自己,還好遇著個工友雞仔,較為好傾,開頭幾日總算好過.

雞仔大我好幾年,住宿舍,相信太古日子唔少?船塢老手,一有新船維修泊岸,條友就知頭知路,上船四處摷?好多時見佢摷到食物物件之類,船泊岸維修,好多時搬運工人收藏起些小貨物,未能及時拿走,咁就益咗雞仔這些人,有次見過有人摷到樽,大大樽紅牌威.

2021年9月4日收到肥佳來電,雞仔先遊走了.

太古結識咗一班後生仔,興致到下午隨時唔返,放棄半天工資,而蛇頭九叔住宿舍,就在閘口冇遠,九嬸愛打麻雀,啲友隨時一聲,就打個下半天,嗰時打的大多二五雞,25蚊邸.

到天熱一聲石澳,就成班友齊齊放棄個下午,走入石澳輰泳,工友大多住筲箕灣,有個係船廠太子爺,帶埋潛水樽,石澳後灘潛水,撈了成艇仔石螺,每人拿些返歸做餸.

年青人多自然多節目,游水打牌搞旅行燒嘢食,跳茶舞,以前跟得Connie多,都跳得兩吓,茶舞大多數彌敦道金漢夜總會,茶舞那時還是張圓圓,(張德蘭)在唱.

旅行溝女

同Connie還是唔清唔楚,還抱有點希望?對女來講都無意發展,免得誤己誤人,有次旅行見蘇思恩想溝個女仔,個女仔叫呀琴,都幾靚女,於是乎懶好心幫吓,聯絡吓傾吓,搞吓氣氛,誰知呀琴有意係我,結果我同蘇思恩面阻反目,自此就無偈傾,不過續後我係無去馬.

嫖滾賭

衰嘢自然有,過年幾條友大船過澳門,賭場穿梳,唔賭錢我只懂拉老虎機,有次拉出三個BAR爆棚,當年五毫拉一次,爆棚響鐘有70多元,亦有次在新花園,部機壞無須入錢,以為有著數不停係咁拉?結果職員來問拉夠未?又工友踩單車,無著衫真皮上陣,結果被司警警告,才知道法例男仕都不能打大赤膊,為咗慳錢不住酒店,幾條友在街上留連到天光.

孱仔角

年青滾嫖一定有,初哥我就多謝孱仔角,手指舞廳就第一次,就係老爺車,對住條女我都唔知點?嫖就吳松街,禮頓道都有,初哥我簡直啼笑皆非,最好笑工友周錦培,第一次嫖就中招生嘢.

孱仔角 2021年9月4日雞仔先遊,以為通知吓佢啦?誰知佢還早?2019年以經走咗喎?

頭破血流

太古難忘,有次維修隻英國掃雷艇,在一號排工作,要反手吊鎚,撞出條鐵閂,結果打空鎚,打中自己額頭,當堂頭破血流,工友用煙絲止血,才走去醫療室,醫療室車去灣仔鄧肇堅,結果被護士話,好用煙絲,後來清走煙絲縫了三針.

甩手飛鎚

有次在船倉工作,船倉兩旁排有防撞梳枋,木枋用鉄碼扣住,我哋工作係將鉄碼羅絲鬆開,鬆不開就用手鎚鑿爆破,當時我爬到頂爆破,誰知兩磅手鎚脫手,向倉底飛下,剛巧曾漢明在倉底,兩磅鎚中正佢胸口?心諗大Q鑊?又好彩無事?

肥佳柴油車

有次返夜通宵班,話就話通宵,實質點零鐘就各自找架步去瞓,天光出閘就賺佢一個通宵工資,夜更玩多過做,初來步到,每部門有部手絞起動柴油車仔,載貨用,第一次接觸,肥佳教玩,車就開動著,我一坐上去,肥佳乜都無講?車就向前行,大鑊?如何煞停?在鎅木房,密麻麻機器,左穿右插,不懂煞停,好彩條友趕來煞停,一額汗.

柴油車又有鑊金,又係肥佳,同樣夜班,當時在條頗窄斜路,下便就是唯一個旱澳,當時澳係無水,衰鬼開車我企車斗,開到好快落斜,開到左搖右擺,足之我整個人被西咗出去,人衝出就要狂跑,嘩!我對膝頭差點要碰到下巴,最弊前面就是個旱澳,衝咗落去實C無疑,好彩煞得停.

開河跳海

開河即係離開船塢,坐船出外,拋泡船隻維修,通常係件好差事,船拋泡大多西環尾對開一帶,船程往返需時,開河友一落船就大油筒做枱,排九十三張賭餐懵,唔賭的吹風睇景,可能季節關係,見過水手一串無餌鈎,係咁拉上拉落,好快成串酒排仔上釣,可能魚仔見反光就搶口?

開河有次賺外塊,外面判頭何沖,佐頓文字樓海邊下船,船拋西環對開海面,做的船換柜面,(船面地台),一碼碼木枋,由貨木船仔運到,要落木船埋碼,準備大船起重機吊上,我埋好碼,準備吊起,誰知不是一吓吊起離開木船,碼木拖著船尾,船頭自然挨埋大貨船旁,碼木就橫掃過來,人就自然縮低,碼木就停在頭頂?心一諗?老爺大貨船?老爺蒸氣起重機?萬一失靈?嘛變柿餅?那時不考慮,呯一聲,我就跳水式落海,然後水梯返回大船.

新船下水

公司福安不是做新船的,但一到新船建成下水,就要揾人幫手,做新船要晾起來做,一個個躉平均分播在船底,當新船建成後,整隻船要降落排度,就要用人手齊齊打甩躉同船底之間木尖,讓隻新船降落排,慢慢跣出大海.

每個躉一排木尖,幾個人分兩邊,齊拉繩鎚去撞,一個躉好幾個木尖,有些老手教路,雞聲未出就打,先打先著數,遲打越難打,船重量集中你個躉度,就難打喎?結果順利下水,難得有機會參與,見識到新船下水.

祥興大廈

工友大多住附近,孱仔角住祥興大廈二樓,不時上去玩啤牌聊天,又有個工友叫蘇思恩,同樣住祥興大廈樓上,而哥哥呀啟同樣做太古,而蘇思恩個家姐就係蘇杏璇,當年還未知佢係演員.

祥興大廈孱仔角介紹,同大廈一家家庭式包伙食,事頭婆有個女同個仔,個女衣著時髦靚女,係個粒妹,在官塘原子粒廠做行長喎?聽聞孱仔角同鄉華根想溝喎?誰知吃不到一星期飯,就被我溝了,好開心好興奮,起初睇戲帶埋個細佬去,到第二套明珠戲院就一個人,當日穿條裙上身披件斗篷,好時嘜好靚女,套戲講乜我唔知?只知我們好親熱,睇完套戲送佢回家,到門口還要佢鍚啖,才讓她返歸,嗰種滋味嗰種滿足,一路回家一路回味.

誰知好景不常,被佢娘親知道?同我講佢係寡母婆,下來旨意晒對仔女喎?我無回應.第二天個女約我見面,就在斜對面常去間餐室閣樓,佢帶同個女仔,同我講媽媽知道喎,話不準我們來往喎?我們分手喎,就把我送的匙扣歸還過我,匙扣係我大丸百貨買的,寫住安全第一字樣,我當時好失望,腦一片空白,不其然用手係咁搣,搣到匙扣爛晒才離開,離開烚吓烚吓,一個人從西灣河行回銅鑼灣返歸.這段短短拾天捌天超開心情,就這樣結束.

三年多又點止咁少事吖?都忘記喇?

生涯(9)感情1966~1970

1970年3月6日裝嵌雲石生捱結束,而我一段感情亦告結束.

1966年尾失業後一班年青人,聚埋玩得好開心,而Connie住銅鑼灣總統戲院附近,距離我家好近,好多時上來,久而久之我倆就生情,愛打麻雀她,自己家街坊C奶打,我家打,我家後座街坊打,無心機讀書,時時同我出雙入對,飲早茶,暴動睇炸彈,睇足球,睇電影,沙灘游水,遠至龜背灣,宵夜雲吞麵,無辣不歡,勁多辣椒油,而我食辣都因佢而起,夜晚拍拖夜麻麻行樂活道,行上大坑道,司徒拔道而下,當年新聞經常發生劏死牛,若無錢要刀自插大髀,都無有識C?

又有次不知什麼節日,Connie帶我入元朗,探佢個親戚,村郊地方踩單車,載住佢踩窄窄田基路,載住佢兜來兜去,技術點好終歸會有跌下來,好彩無事,不過到夜離開,就大鑊無車,當年交通無車走係好普遍 .

有次同佢二人上獅子山,上到獅子山頂好大霧,視野好近都看不見,山頂所有人都不敢郁動,人人坐定定,靜待大霧散,突然有人大叫,誰人掹我腳毛呀?嗰環境突然一聲,永遠都記得?落山後獅子山還未通車,而工程就接近尾聲.

最難忘係的,每晚大多數都係佢送我回家,待我瞓著才離開.Connie脾氣都幾壞,好多時鬥氣多過溶合,不歡而散.

這段情維繫到1970,終於傷心欲絕而散,Connie父母早年移民美國紐約,兄妹二人要離開,飛紐約與家人團聚,送機那日在機場離別,從未試過乜叫做心酸?眼淚不特止,個心𢲡住𢲡住,一陣陣酸的?非常痛苦,這是我有史以來未試過?

747飛機離開啟德機場後,每日都寄信過佢,起初有回信,由寄信到用郵簡,郵簡平5毫子個,我都唔明白?又會有咁多嘢寫?寫到郵簡滿各落?後來終於無回音,家姐見我傷心,帶我去大東電報局,打長途電話,打通就50蚊頭三分鐘,若要專人接聽就75蚊三分鐘,記得當時好緊張,電話一通,我就叫Connie,後來對方問?不是佢本人,你聽唔聽喎?結果我都係放棄.

回家後家姐有朋友住紐約,住Connie附近,得知Connie情況,話佢老豆有意斷絕我們來往,經常帶她去玩,讓她散心忘記喎?之後用家姐朋友通過好幾封信後,就石沉大海,續後心灰意冷,將佢留吓物件相片全燒掉.

但腦海一直沒有忘記,不竟三年多感情,相信有日佢會回來,跟住幾年,有女仔主動,我都無意接受,一直保持心態,寧願人負我,我不負人.

生涯(8)雲石裝嵌1968~1970

1968~1970

由於彈墨長期一個人工作,做到心灰意冷,碰啱裝嵌雲石請學師,又嚐試吓換吓環境,請我位工頭叫陳有,公司名稱叫香港雲石廠,鋪頭在告士打道海旁,同灣仔碼頭好近,老板上海人,

辭工後翌日1968年11月4日以經開工,每朝返工返鋪頭,等工頭陳有柯打派工,散工人工12蚊日,無工開無錢,自己唔返又無錢.

開工收到柯打就跟住師傅開工,搬運切割好雲石料工具上車,搬運雲石要有技巧,兩個人搬一個人搬,怎樣慳力怎樣不會搬破塊雲石?雲石種類多,大理石,花崗岩較堅硬,不易破裂,而玉石,石灰石,洞石,較易跟紋裂開,由其玉石好易裂開,較易裂的要加固個底才運送,記得有次去半山有錢人家安裝火爐,面塊玉石,同工頭陳有裝嵌,到塊面石放到還差兩寸位,就砰一聲裂開,裂開裝嵌好有展口,摸落刮手鞋口,為有用物件遮蓋住,立即call回鋪頭,揾打磨佬來化妝,至於呃不呃到人?就不得而知?

其他石就易話為啲,不過鑽0隆落鈎卦墻掛頂?就大鑊,當年電鑽最叻係得麥太保?而且矝貴,我們還用緊手攪鑽,麻石,花崗岩點鑽呀?所以個0隆深度個鈎有限?經過要小心？

地盤細就兩個人做,地盤大就多幾個,除打理人陳有,師傅有麥心,呀禧,朱羅,陳福全,陳有個仔,學師得程永祥同我,大多同老闆有關係.

鋪頭內閣樓做寫字樓,文員先生姓鄧,地下尾後到後巷,就係人手打磨,雲石塊打磨修邊,例如雲石枱及所有邊位.跟住就切割鋸石,師傅叫初哥,肥佬一名,跟佢條友叫九江仔,再出些鋪面,兩邊旁放滿雲石.

有時雲石須要刻字,就判過畀條友叫呀泰,呀泰睇佢身型就嚇C?條友整個人變晒形?由於雲石要放地下晾平,塊石唔郁人要郁,整個人扒在地來鑿字,要就塊石來鑿,日子有功條友鑿到整個人畸晒型?年紀同我們相約,唉!點出來溝女呀?

所做工程都裝修既居多,大的如銀行門面,戲院門面,細的如一塊雲石招牌都有,大多裝修鋪位門面居多,一間鋪面兩條柱,頂頭一幅,兩個人大概兩三日就完工.

15日一期糧,工頭出糧例牌賭幾手,好彩我唔賭錢,就係咁有工開捱,無工開又捱,學到會裝嵌,開水泥,鐵䤼屈鈎,鈎住墻同雲石,就無乜嘢學會?不過雲石裝嵌好危險,泥水根本黐不住塊雲石,靠條鐵䤼鈎住,石相當重量,由其頂裝分分鐘塌下,總之不要站在雲石下.

就係咁開吓停吓,一直捱到1970年3月6日,一年4個月零兩日,雲石裝嵌生涯就此結束.

1970年3月7日另一生捱開始。