生涯(18)1980/03/03～1981/02/28沙田第一城

1980/03/03~1981/02/28 沙田第一城  十四座

80年2月離開偉成建築公司,1980年3月3日經同事介紹來到沙田第一城,新鴻基名下,新輝建築公司,第十四座開工,散工日薪55元.

當年交通還未有車直達,要坐公司車入地盤,沿途經過乙明邨,沙角邨正在興建,亦差不多完工,中午飯要請女工來地盤煮,又或者坐船沙田畫舫食,直至翠榕橋建成,工人就步行過禾輋商場食中午飯.

十四座管工係歐陽標,助管黎華檳,初來地盤剛上到二樓,初來步到,原來原底有班墨斗,只不過扭計唔做,就我來接手,跟住請來一班墨斗仔,一時間幾個墨斗仔跟住我.

而隔離十三座,同一形式,同樣有一個管工,一個助管叫羅興洪,墨斗王有個梁海光,有個名字忘記了?但佢個樣似哈巴狗,所以按佢花名叫老虎狗,而跟尾就有個墨斗女,話係建造業出來喎?女仔造墨斗第一次見?而老虎狗同梁海光同樣經常唔返工?

由於管工與管工關係,週時叫我去幫手,變咗兩座要靠我,那時來講,我就變成天之驕子,就係咁做咗兩個月,我就要求轉長工,驕子叫到,就1980年5月6日成為長工,月薪1750元車費200元.

就係咁一做,就做咗一年,地盤起貨完工,個人都好唔想做,好想唞吓休息吓,1981年2月28日就辭工.

期間難忘的?不竟40年,記得的都有限.

結構嚴謹

從事建築以來,未見過對建築結構咁嚴謹?有次見電工留暗喉,留錯位置,只不過位置差些少?電工要鑿開石屎來移正,誰知驚動業主顧問,大會就用大聲公廣播,停晒工的,叫顧問百佳去查究,可見第一城對結構係好緊張.

女墨斗.

第一次遇上女墨斗,期間有次工作,喬線墨斗線落坑打結,就收放不成,要挑回正軌才可運作,於是乎一個做拉著,一個做喬同放?墨線突然順番,墨線內墨水就四濺,濺到個女墨斗一臉都係墨,尷尬非常.

圍村喜酒

跟我墨斗仔呀邱,本地赤泥坪人,中文大學對落,圍頭客家人,同表妹結婚請飲,在佢圍村擺,圍村飲喜酒第一次.

綿羊仔第一次

地盤建成馬路建妥,跟我有個墨斗仔,天天返工綿羊仔代步,有日無聊問佢借來玩轉?問我駕駛過未?呃Q佢駕駛過,於乎是坐上去,一比油就死火?後來掌握到,就咁地盤兜咗個圈回來,話佢知我第一次咋,下次無玩LU.

地盤去到尾聲,第一城十四座剛好做滿一年,1981年2月28日我就辭工離開.

離開前跟我幾個墨斗仔,話橫掂得閒不如北上旅行玩吓喎?幾條靚仔無個有經驗,我北上亦無去過?但我又想去?於是乎膽粗粗,由我帶隊一於北上闖闖.

篇幅過長,下篇再續。

桂林之旅

生涯(17)偉成建築公司1977/09/25~1980/2 大埔康樂圍

大埔康樂園1979/11/22~1980/2

1979/11/21離開世界花園,翌日1979/11/22被調到大埔康樂圍.

康樂園在大埔,當年來講實在太遠,家住香港,每朝晨咁早隧巴,到紅磡體育館,公司有大巴接送入康樂園.

遲到就返歸食自己,晨咁早個個伙記,一上車就乜都應成你,每個工友個酸薑頭,你同佢講乜?都係點頭應承你,個個都中吓中吓入到康樂園.

地盤好大,整個山頭,好多公司瓜分興建,而偉成拍住間大陸公司,兩份拍住興建,我哋老總係梁權,係伊利莎伯大廈班團隊,報到後安排第七組,組長係大陸人,每組大概7,8人,香港人大陸人各一半,我組除組長外全是廣東人,溝通上係無問題.

與一間中國建築公司合作,兩份拍住興建,康樂園建的是單楝式屋仔.

第七組,組長係大陸人,好奇怪整組大約7,8個人,無墨斗仔,一個大陸人拍住一個香港人來做?除組長外我組拍檔全是廣東人,溝通係無問題,不過個個都上了年紀,見識同做法同我們香港差得遠.

就咁做咗三個月,做到1980/02/月,我就辭工不做.

期間都發生好多難忘事.

工作差異

由於大陸開放不久,工程技術落後,工作方式有差異,由其彈墨施工不同,大陸公司初來香港,大概都係來取經學藝,所以中港兩人拍住來做,就磨擦多多?由於獨立屋仔太細,工程有限,所以每兩人一組負責6,7個屋仔地盤.

痔瘡爆發

當時各組孭鑊頻頻,彈錯墨線,錯漏百出,公司為免工程出錯,規定我們各人重複度尺一次?即係你度一次尺,我又重複再度一次?麻Q煩谷Q氣?我就同拍擋來個約定,你作主負責3個地盤,我作主負責4個地盤,有鑊自己孭?唉!以為喱鑊難到佢啦?誰知翌日佢痔瘡爆發要放假休息,結果還是我做埋佢份.

大陸佬閒談

有次落石屎,揼車失靈,石屎落不成,要等另部揼車到?而另組大陸人這樣說,佢話我哋內地邊會發生咁事?用人手担上去都落完囉?真係唔識講?又有次見有棵樹在路邊,又另組大陸人這樣說,若果在內地,都唔知做咗幾多件傢俬喎?又話一間屋仔用咁多綱根,若內地可以建成好多間屋喎?當年內地物資缺乏,一點唔奇.

英制轉公制

初來步到,由於香港建築圖則,開始由英制轉用公制,做慣英制12寸一尺,現在公制,起初好唔慣,有次量兩條陣距離闊度?點解望落去頭大頭細?回頭再量,又無錯吖?唉!原來一米=1000,我量咗1100當一米?1000同100差個0,1000前面嗰個100,當咗1000.

打爆機

一同掉來康樂團的全部掉散晒,而世界花園茶檔姓羅太子,有點神神哋,大埔食完中午飯,息都唔休就機鋪打機?日日如是?有日佢好高興回來,問佢乜事,佢好輕挑咁講,今日終打爆機喎?唉!日日一蚊一蚊的打?打到爆咗,又為乜呢?

辭職唔做

地盤又遠,做又做埋大陸佬嗰份,發放花紅大陸佬就大大份,心灰意冷,剛好沙田有地盤請人,見有後路,就辭職唔做,長工要一個月通知,通知嗰日我在地盤寫字樓大發牢騷,說些負氣不公平說話,話啲大陸佬刮埋我們啲花紅,又雪柜又彩電回鄉?搞到地盤主任出來叫住?話我唔應該講這些說話.

終於衰咗

辭工後待夠一個月才走得,誰知臨天光賴尿,一地盤屋仔地腳做錯了,一條地腳躉做錯咗,唉!就係一個三角嘜,嘜錯方向出事,本來嘜向東,卻嘜向西,咁就成條地腳躉錯晒位,扎好鐵石屎落埋,整條地腳躉不要得,要重新做過,從事彈墨以來未衰過?喱回真的有點難忘遺憾?

失敗扣糧

在等一個月通知期間,沙田地盤急需開工,於是同公司嚴經理講聲,我要提前半個離開,誰知到出糧他媽的,扣咗我半個月工資,按規矩來做喎?無話可說.

1980年2月離開,就結束我偉成兩年零5個月生涯.

1980/03/03沙田第一城開工.

中秋節快樂