端午節,腳痛消炎藥,修單車,大乜樂下午茶,無買餸,晚飯三人食.

昨日家居又改革,晨早整電腦遷出廳,又拆層板,個仔成3點鐘至來幫手,擒高爬低,無佢真係唔多掂,來到整組路遊器遷出廳掛貼天花,地方淺窄雜物又要搬來搬去,又要拆層板,足足整咗成日,到到晚我隻右腳板又痛起來..

 今早又晨咁早5點鐘醒,失眠瞓不返,6點鐘老婆起床番工,我都起來,洗面上網食早餐,腳痛依然,無偈,為有又啪粒消炎藥.
百無聊賴為有上網mytv看多集神的晚餐,看完看直播龍舟,又youtube看花千骨,看看吓瞓著,12點多啲個仔來電嘈醒,話佢知淘寶大把電視掛墻架買,20至30人仔有個,唉!個仔中晒毒,話大陸嘢信唔過,分分鐘成受不住跌下來,唉,吹漲,金屬鐵架點可能?至多買回來同心水有出入?咁價錢唔啱唔駛恨,有偏見無得講,賺晒我口水.
1點多鐘落單車場,由於單車場維修,要移走單車,移走單車後,見有部單車無人要,都幾個月無郁過,唔走就當垃圾清走,不如等我修修佢,用得唔好嘥,推回家條單車鍊銹蝕到梗晒,回家加點潤滑油才稍為鬆鬆郁得吓.
推回車場鎖好又3點鐘,老婆放工,雪柜大把隔夜餸,不用買無餸,叫老婆返來自己商場食大家樂.
大家樂揾好位,等陣老婆到,老婆少有要份細餐,我就米粉餐.

吃後行惠康,榴槤8.9蚊磅,又揀吓,結果又買隻4.9磅,36.6蚊,特價香蕉5蚊返歸.

 回家老婆公司,員工糉一隻.

今晚餐飯無買餸,清雪柜.

全部隔夜嘢,有榴槤殼湯,垃雜炒飯,煎糉子,鹵柚皮,垃雓煎蛋,肉碎南瓜.

開飯三個人食

. 

飯後果又榴槤