鼻敏感發作,無覺好瞓,家居改革,廳加層板房油漆,下午茶食呀大,晚飯當宵夜,三個人食.

昨晚半夜鼻敏感發作,噴嚏打不停,無得瞓,起來呻輪鼻水,再瞓又無事,一覺就今早7點幾鐘醒,起來還是鼻水噴嚏,好在不太嚴重,粒多鐘就收,洗個面上陣網早餐,餐後搞掂一切,又9點半鐘.

休幾日息,今日家居改革又開工,個仔未到為有做住啲一人工作,張床拆散下,剩下柜桶.拆住等.

成1點多鐘個仔才到,開始整個層板,地方淺窄,又向天花發展,墻有墻收,天有天花吊,做下個初型又3點鐘,老婆放工,齊齊落樓下大家樂下午茶,填肚後街市買點菜.

回家同個仔先收條鋁糟上天花,好衰唔衰近窗邊的我,一不小心,隻手碰一碰,整隻士巴拿跌落街,好彩當時傾盆大雨,又好彩無人經過,否則就大鑊,嗱淋担把遮落街揾,哈!又奇怪揾極都唔見,無都無偈?

有老婆幫手,個仔就返回房間油漆.吊好件層板望吓,有無搞錯?歪歪斜斜,唉!烏龍百出,碰口同冚口,鴛鴦差成寸,又要番手.

一搞成8點幾鐘,執得架生嚟,清潔好又成9點幾鐘.

嗱淋沖個涼煮飯.又一次晚飯當宵夜食,簡單啲,煎芙蓉蛋.

爆司華力腸,

老婆煲落個粟米紅蘿蔔合掌瓜湯.

 

三個人食.