相當好一個早上,反彈減持,游水700m,大圍拮嘢,晚飯4人食.

昨晚12點前都瞓,一覺今早7點醒,笠個耳筒聽新聞,半昏半瞓下賴到8點半鐘,睡來相唔錯,鼻乜事都無,洗個面搞早餐食,幾年來未試過今個早上咁好,看來我的鼻敏感已成過去,昨日忘記買麵包,今早無著落,為有鮮奶麥皮食月餅.
開完個大又9點半鐘,個市又開,唉!幾日來跌到呀媽唔認得,撈底的損手爛腳,今早見高開239點,都係咪搞,蝕就蝕啦,襯反彈減持,搞掂後又10點多鐘.
11點半鐘個仔同新抱放假出街,個女瞓醒話整麵包喎,我無你咁好氣看電視.
看完楚漢1點多鐘,話知你去游水,過到泳池1點46分下水,200m稍唞200m,又200m,再游多100m夠皮走人.更衣室沖埋個涼,見有時間同呀王吹吓水,又同呀王上課手機堂.
3點鐘老婆放工來電,約過大圍食拮嘢,每人食個飯餐40蚊.

餐後買餸,行轉街市買有,蒜頭9蚊,三文魚扒18.6蚊,豬展21.1蚊,粟米12蚊,返回自己街市,惠康買排蛋27.8蚊,菜芯一斤10蚊返歸.合共89.5元

今晚餐料有,三文魚扒,菜芯,栗子,魚蛋,雞批兩隻,昨晚紫菜,蝦米一執.

 

煎封三文魚扒.

 

灼淥菜芯.

 栗子魚蛋炆雞.

蝦米魚蛋滾紫菜

 4個人食,

飯後果牛油果.