我的耳鳴歷程

幾年來鼻敏感困擾,每晚鼻水累積,積壓著鼻痛而醒,好點就晨早積壓醒,唔好就半夜以經醒,起來不停要呻不停要打噴嚏,無覺好瞓,呻輪打輪要用枕頭墊起背脊,半坐式來瞓到天光.

 2014年7月中.

無晴晴耳有點盟感覺,像坐飛機氣壓一樣盟晒,時有時無,任由我捏鼻來谷,都不能通,一直耳盟盟感覺,諗吓上網摷吓,唔通同鼻敏感傷風影響有關?

2014年9月24日

耳盟盟越來越明顯,於是乎走去看家庭醫生,看吓能否冶好傷風,醫生都針對下,開些維他命C同鼻敏感藥過我,三天藥好快過,但都係無效.

2014年9月29日

耳越來越盟,無偈可思,於是走去看政府街症,是個女醫生,當時係右耳盟,佢用儀器睇完右耳,跟住看左耳,再看回右耳,就話耳發炎,嘩!當時好高興,終於找到個原因,發炎好易話為,比咗啲藥水我滴耳同消炎藥丸,今鋪看來有救,滿心歡喜回家,一滴滴我10日,滴到我悶,一點進展都無.

2014年10月6日

滴咗10日見依然無效,滴到我怕怕,看來都係斷錯症,見西醫唔得,於是乎走去明愛睇普通中醫,睇咗次連翻渣藥都食咗4劑,都係冶傷風感冒為主,諗住再去睇啦,誰知個醫生放大假,見來到求其睇一個,是個醫女醫師,鬼咁後生,不點信心都都無,睇過後又翻渣食4劑,一點作用都無.

2014年10月13日

中西醫都無效,但耳鳴還是不太嚴重,又試吓上網搜吓料,於是乎買盒艾條來自己艾炙,當然係唔得.

2014年11月10日

亂打亂撞諗住去博愛中醫部,拿住第一次放假中醫師舊藥方,諗住叫佢照單執幾劑冶吓感冒啦?誰知係唔可以既?一定要當天醫生診後才可以執藥.

無辦法下問句,咁樣現在還可以安排睇嗎?佢話要等囉,我又問耳鳴應該要看什麼醫生,佢推薦我針炙,係教授級要貴些,見來到好啦又試吓.

結果一試連食藥針灸共六次,每次診金210蚊,又執幾劑藥,隔日煲來飲,連藥大約560元一次,預約大約每星期一次. 

2014年12月23日

經過針炙6次無效,迫於無奈為有再睇街症,希望能轉介耳鼻喉專科.結果一睇無須多講,便寫紙我轉介專科.

帶點興奮拿著轉介信去威院排期.

交過轉介信後在等,一望個告示牌,嘩!嚇死人,本門診等候要到2016年12月,若大埔那打素醫院要等到2016年3月,豈不是等成兩年?後來姑娘講想快些,去油麻地診所.

於是嗱淋趕去油麻地,一約要2015年8月,比威院快年幾,比那打素大半年.

2015年1月5日

有日上網摷吓料,原來工聯會有耳鼻喉科睇,於是一約今日看專科,話我可能耳血管收窄,血上不到耳,耳神經損壞死,又睇埋個鼻,就給我兩隻藥,鼻敏感藥同擴張耳血管藥,還要我約期做聽力測試.

2015年1月16日

工聯會做聽力測試,一做差到痺,指住張圖表話我節節向下.

2015年1月19日

工聯會專科覆診,醫生看過報告,話無得救,耳神經細胞壞死,佢話黃金期兩個月,無血上就玩完,不用來覆診.

2015年1月20日
又上網摷摷料,執咗劑咁嘢,食咗兩次,嘩!寒涼到不得了,飲到反胃,嗱淋掉落垃圾筒.

 

2015年1月20日

不知個女從何得知,說香薰加椰子捽兩耳傍會冶耳鳴,但捽到今日2015年1月20日,未有好轉過,捽到悶為有放棄.

下來乜都無做.

2015年2月1日

耳鳴似有點轉機,左耳鳴似乎走回右耳,走來走去都不是第一次,到翌日呻鼻涕時,對耳竟然會通,丁一聲,係耳鳴以來未有過跡象,之後耳鳴慢慢輕咗,程度比嚴重時輕一半.

2015年5月1日

耳鳴開始明確好轉,我又無食過些什麼,係食過黑豆浸醋,但番查紀錄,同耳鳴好轉輕咗,時間一點都不吻合,至於同佢有無關連就不得知?

2015年8月7日

政府耳鼻喉專科,終於輪到應診,本來預約係8月28日,一改再改到今日,本來耳鳴好番,好想放棄唔睇,但等咗大半年,都係去睇,門診新症100元,稍等先來個聽力測試,笠上耳筒,靜如深海,跟指示有聲音就揚手,測完左耳測右耳,又測頭骨聽覺,測完又重覆左右耳再來一次,攪掂攞埋份報告,返回外便等見醫生.

大 約等咗廿分鐘,係位女醫生,話我聽力測試,對耳無事,係左耳高音差啲,跟住將我耳鳴經過話佢知,佢話耳鳴係會無晴晴好番喎?咁就講我鼻敏感事過佢知,之後比咗啲鼻敏感藥同覆診紙我,便攞藥走得.

 2016年3月25日

耳鳴須然感覺上還有點輕微,去到2016年3月25日,嗰日游完水回來,耳鳴突然嚴重,一直嚴重咗12日,心諗耳鳴醫咗年幾,乜都試過,都諗住唔理佢,突然諗起黑豆浸米醋,於是炒豆浸,但食咗三日,每日一次,每次10粒8粒,真正食咗三日,竟然耳鳴明顯無事,不過我係唔信囉.