我的心臟病歷程(3) 二 疑似心臟病,又闖急症室

我的心臟病歷程(3) 二  心臟又來料.

自2010年11月9日留院三日,唔清唔楚出院,為有信任醫生嗰句,老人家唔多唔少都會有些細微血管塞喎?
出院日做咗個心臟超聲波,還未有報告,還有2011年2月22日運動應激心臟超聲波檢查未做.

2010年11月23日  事隔14日又來料
晨早6點多鐘,瞓到夢鬆鬆,心臟又來料,胸口又悶又翳,半邊膊及左手軟晒無力,呼吸有點困難,但又無拿住痛感覺?醒咗一陣,情況依然,為有起身出廳,攤響梳化飲啖水.攤咗好一陣,無辦法?為有噴救命藥保心安噴劑(即俐底丸),噴咗一吓落俐底,感覺好似噴得唔多正?見5分鐘無改善,於是又噴多次,之後才慢慢舒服返,而且還瞓著咗.

2010年11月30日   事隔7日又來料   

老婆放假例攪家務,左祙右祙,又清潔廚房,清潔唔特止,還要拆埋灶底個架來清潔?拆後還見有條鹽蛇乾?
到11點多鐘老婆清潔好,要嵌回個架,於是乎幫手啦?誰知一埋位,心口又來料,又翳又悶,同樣左邊膊同手軟晒,為有停下來,坐埋一邊飲啖水,唞咗陣情況依然,我同自己講,比多10分鐘,情況一樣,我就噴保心安噴劑.(其實好唔想噴藥?噴多無益)
結果都係要噴,噴後又同自己講,5分鐘後重係唔舒緩,我就去急症室.
迫於無奈又急症室
到1210,同老婆講換衫去急症室,急症室途中,佢老味吖?又無咁唔舒服喎?1225去到急症室登記,好快便分流到緊急區,等見醫生,好快便叫到名見醫生,將情況同醫生講,醫生話會同我做兩set檢查喎?留不留院要睇今晚報告,晚醫院會有飯你食?唉!有病都無偈,你話點就點啦.
問醫生應否睇急診
見醫生咁好傾,又問吓佢?其實我咁情況,應唔應該來睇急症?佢話應該,你通過波仔做過搭橋手術,胸口痛後果,大家都唔知道?
心電圖男護好好人
之後返回等候後區,個女又到,我話咁多人響度都無用,不如你倆去探外母,有乜事再電聯.
1445男護士來叫做心電圖,重讚我條大拉鍊靚,男護有點売頭,年紀唔細好好人,做完叫我不要返回去,嗰我邊太多病人喎?跟住比份文件我,叫我去照肺,嘩!點設計?個門口同個開門撳制差咁遠,設計白痴.
交咗文件等候其間,又聽見叫名抽血,為有大大聲等緊照肺呀.
抽血員忙甩轆
照完嗱淋趕去25房抽血,原來好多人在等抽血,兩個女一個男抽血員,有個女病人,睇住個女抽血員,拮到滿頭大汗,後來三個抽血員都抽佢唔掂,個女人手血管太幼太穩閉.
後來輪到我抽,聽兩護士交談,話剛才個女仔,師父都要拮兩次喎?
人有飯食我無
抽完血返回26等候區,咦?有病人食飯?點解我無架?算啦,都以經3點幾鐘,都係等老婆買嘢來食.
無聊同醫院個食蕉傾偈,偈偈吓都瞓著咗,到5點幾鐘,老婆來拍醒,有水有麵包食.
又唔知等幾耐?老婆同個女外出食飯先,我又同食蕉吹水,同食蕉打賭吓,食蕉收10點鐘工,我話又睇你收工先定係我離開醫院先?
留堂定出院
到10點鐘食蕉收工,而老婆同個女亦回來,我就返回26區等報告?個心十五十六,究竟今鋪出院定係留堂呢?
醫院要做做晒
去到10點多鐘,終於個咪叫到名,好緊張?還未埋到醫護區,離遠個女醫生以經說,你無事,埋到去醫生話,醫院要做的已經做晒,有個建議比你,有能力就外便做個3D心臟CT掃描.
建議做3D心臟CT掃描
這時老婆同個女才過到來,醫生又重覆講多次,建議我外邊做個3D心臟CT掃描,大約2800蚊,邊處塞乜都睇晒,好過比日日提心吊膽吖?我話我通過波仔又搭過橋,到時掃描出來係塞?咁再可做什麼手術呀?佢話要視乎塞既情況,才答到你,可能我以經騰晒雞,重覆再問多次,醫生以經發脾氣,再塞要換心呀.
推薦香港體檢最平
後來醫生話香港體檢最平,話佢老豆又係瞓瞓吓胸口痛,又係響香港體檢做喱個掃描,照出塞左三成,咁就一天都光晒喎?
岑醫生跟進
之後佢話你照完後,拿份報告來,我幫你睇,我姓岑你寫下我啲更期,到時你來我幫你睇報告啦,我個女話不如你留個電號,到時聯絡你啦,岑醫生話唔得喎.
之後唔該走得,離開不遠,醒起有無藥食呢?正追入去,即時被人喝住,唔入得再去,後來才說無藥,食回原有藥喎.

心臟病成迷?唯一出路心臟CT.