江西龍虎山+三百山温泉酒店四天(2)龍虎山上午,遊竹筏,懸棺表演.

江西龍虎山+三百山温泉酒店4天(2)

上午 竹筏  懸棺表演

昨晚23:00才到步,取了房號9367上到三樓,同老婆拖住個喼,係咁行係咁揾房間?行咗好耐都未找到,夜麻麻人影都無隻,兜來兜去迷宮一樣,咪話唔心寒?行到尾尾才找到我們房間.

入到去重係複式房間,睇到樓下望不到樓上,嗱淋沖涼,乜都唔敢諗就瞓.

半夜三點鐘急醒,戰戰兢兢的落樓下去所,完所後都不敢思索,速速擒返上去瞓,唉!好衰唔衰瞓不返?電視早早關咗又唔識得開番?又唔想拍醒老婆,就係咁尾閉眼等天光,7點鐘老婆手機響才醒.

7點半鐘早餐,嗱淋梳洗,執齊行理離開,出到走廊,才發覺山莊真係好大?依然人影無隻?可想而知昨晚深夜如何環境?好可能全層得我兩公婆住都似?

拖住個喼係咁行,係咁兜,終於來到唯一部升降機,落到餐廳,見有班白衫白褲團體在早餐,起初還以為國內旅行團來,穿著睡袍來早餐,後來才知道係太極團體,早操完早餐.

落到另邊餐廳07:27,見到其他枱團友以在用餐,獨係我圍人影都無個?後來開了枱,埋了位,其他團友才陸續到,早餐還是一般,白粥,雞蛋,饅頭,蕃薯之類.

餐後08:02山莊外圍行吓,又幾靚吓,往上行個圈,見有幾個太極成員,大概耍完太極收操卦?

8點多鐘返回停車場,08:30準時出發,地陪小芳亦蒲頭講解.

10分鐘車程來到這裡廣場,地陪導遊買門票,等候其間又拍吓照,拍輪照買妥票,來到正門入口處.0913派票進場.

進場後排隊坐環保車,有旅遊車同火車兩種.

環保車分好幾個站,我們一直搭到尾站,09:46來到尾站,大鑊落雨添?重係大大粒,來時好好天有太陽,就係咁連傘都無帶.
落車後無遮無蓋,嗱淋走去擺賣攤檔度避雨,



山區地方時晴時雨,企陣又無雨.其間見升空氣球大兜生意?又竟然有人幫襯?相信內地遊客多?越升越高,工作猛問夠高未?誰知觀眾齊聲大叫,高啲,高啲?越叫越大聲,氣球一次比一次高,氣球只有垂直升降,係無得飃離.



睇輪人家玩氣球,諗吓時晴時雨,等陣坐竹筏?無得避嘛大鑊?唉!都係無為慳?團友買5蚊兩件,開價4蚊一件,好彩我都成功講價5蚊兩件.
買後已經10:06分,導遊同地陪才到?話導遊証件入閘有問題?又要地陪返回救駕喎?才遲到現在喎?
進場後便來到竹筏灘,1015就開始我們竹筏之旅.
10:16落到竹筏,船家便問要不要講解?先前導遊講過,講解要收錢,見講的是虛構嘢,而且普通話唔多懂?都係無幫襯,不知是否無幫襯?感覺竹筏特別快?
途中小販售賣糉仔,拾蚊一抽,一抽拾隻,團友買咗抽,當然黐來拍拍照,團友還送我們兩隻,糉子確的骰,靚靚手工,同食的糉無分別.



處處山壁處處穴,穴內有板枋,大概承托棺木用卦?





觀吓舟望吓山,大約半小時竹筏完畢,10:46拍岸就此結束LU.
由於國內旅團太多,上車落筏整團人都分散晒,又要灘頭等候.等候其間老婆撐上小山上觀看?我就無能為力,為下便等候.
11:00導遊地陪到,嗱淋揮手示意老婆下來,又繼續前行,行不到兩步,就係著名景點,大地之母喎?繼續前行,兩旁擺賣,有蚊怕草兩蚊棵,手織草扇不二價,大小10蚊.

大約廿分鐘路程來到渡頭,話乘艇過對岸,看懸棺表演喎?人太多,大陸客永遠都係打尖,幾艱辛苦下才排到落攤頭上船.
渡河其間見有水上活動,水上電單車及其他水上遊戲.三分鐘船便到對岸,地陪話升棺後還未落棺好走啦,等到散場人多混亂就難走喎?
趌跛跛的我當然不行遠,就在碼頭附近,找個好位置坐下觀賞.他媽的?坐下不久,竟然走來幾條內地客,煙不離手的吞雲吐霧?真係契弟走得麽,另覓地方企來觀看.

隔岸觀賞實在太遠?肉眼望過去,有乜移動真係唔多覺?感覺不睇也吧,來到即管又睇吓,唉!太遠音樂聲太細,表演開始咗都唔知?圖片回來放大才覺啲料,嘥氣.

棺未落我同老婆都走,可惜你精人唔呆,啲人老早霸定碼頭離開位,睇升棺排頭位,你走佢未走,就係咁塞住晒,混亂非常,結果同老婆要分開走.
返回對岸等咗好幾拾分鐘,團友才能人齊報到,才去食我們中午飯,途中來到這個廁所,聽到團友講,廁所牌有中文,有英文,有韓文,獨係無日文.望吓又係啵?
回想當年2006年張家界,鳯凰古城內擺賣亦有個牌,寫著謝絕日本人,意思都一樣.



幾步腳便來到我們食中午地方,旺旺酒家,唉!景點內用餐,打崩頭一樣,混亂非常,連椅都唔夠?膠櫈下,團友坐坐吓,人仰馬翻,好彩無事,

由於篇幅過長,又要下篇再續