11月25日(六)睡好,精神稍好,老婆沙田街市,整日在家,茶大家樂,淘宝到褸鍵盤,晚飯4人食.

 2023/11/25   星期六   晴   22C

昨晚11點前瞓,夜所三劑,今早7點鐘醒,賴床8點半鐘起床.新抱B老婆陸續蒲頭,我就如常烚水搞早餐.

衰豬起來掛住玩,三推四請都唔洗面擦牙去所,到擦牙舊牙膏未用完,係都要開新的,唔比就係咁扭,係咁喊,嫲嫲堅決唔比,佢娘唔比下終於屈服,0932早餐.

1035母女出門石門上英文班,我就辦埋件事,11點鐘老婆又話出門去買魚,無所事事我,不如執執自己個枱面,唔郁由自可?稍為郁吓條腰痛過鬼?

執過𧙕過1155老婆買魚返,去咗沙田街市買喎?買有八爪魚仔30蚊,鱸魚條25蚊同條倉魚30蚊,回來就處理佢午餐,1312老婆開餐.

1350母女返,佢娘唔舒服買成藥返,食過成藥就篤B做功課,精神唔好我就入房床攤瞓吓,但始終瞓唔著?

去到3點鐘係時候下午茶,還以為我倆老去,誰知要帶埋個B去,佢娘想瞓吓喎?咁就來個協定,茶後不去遊樂場.

1510出門,落到大家樂,個B就食咗嘢返,咁就要個义瀨餐加雞翼40蚊,老婆7蚊熱檸水,合共44蚊.

餐未到個B又徵用我部手機,餐到我就雞翼拆骨起肉個B食,我就义燒瀨餐,餐前拍張照先?衰豬就整古做怪?

吃過坐夠返歸,返到樓下我就撩吓個衰豬,我話瀡滑梯囉,衰豬高興到飛起,嫲嫲即時話,講過乜呀?衰豬當堂扁晒咀返歸.

回家1638,佢娘瞓咗,冇耐個B老豆返,我都早點沖涼,涼後1718飲我第二劑補茶,茶後寫寫我今日blog.

1820新抱買餸返,帶有淘宝料返,有我件風褸同我個迷你藍芽鍵盤連滑鼠,新抱話送畀我喎,好,咁就多謝先,個B當然唔少嘢啦,多條靚靚公主裙.

風褸就試過,又幾好,鍵盤就要差電?

2112開飯4個人食.