耳嗚看醫圓洲角,預約專科油麻地,約後食碗魚蛋河,行去旺角腳都跛,買件水箱配件80蚊,晚飯兩人食.

個星期來,耳嗚日趨嚴重,無計可思,最一著,昨日星期一,諗住冬至做節無咁多人看醫生?晨早9點鐘至電過政府診所預約,看能否如願看專科,誰知一Book今日全線爆滿,最快明天9點15分,重係別區圓洲角診所,都無偈為有ok.

昨晚12點未夠便瞓,一覺今早8點15分,睡來尚算唔錯,可惜夢就多啲,唉!喱輪都係咁多夢,老婆同時亦瞓醒,約咗9點15分圓洲角見醫生,嗱淋梳洗,辦大事又OK啵,食過早餐8點50分量個血壓128/69-57,帶齊所須9點鐘出門,哈!老婆又著衫跟來?我話我踩單車啵,叫搭車喎,我話行得嚟夠鐘喇,cc氣留響企.

過到圓洲角診所9點20分.

 

45元登記卦號,3號房8號籌,望吓螢幕3號做緊3號,還差5個,好快啫.

 

真係好快,見睇到7號,於是去量血壓等陣見醫生,大大話坐咗半粒,一量竟然145/93-p78,未量完以經輪到見醫生,醫生姓鄭男醫生,都不敢即時叫轉介專科,將情況講佢知,7月中開始,看過西醫,一次這裡,說我發炎,滴耳藥水,但10月中從左耳嗚轉去右耳,左耳變了無事,以我理解應該不是發炎,普通中醫幾次,針炙6次,中藥27劑未計番渣,一路講佢同我用儀器,兩耳都睇過,話無發炎,佢話可能退化,不如寫紙你看專科,我話要幾耐,佢話唔知架?就比啲維他命丸過你食,睇吓幫唔幫到你,你有還乜徵狀呀?我話幾年來流鼻水,嚴重起來就食收鼻水藥,手凍腳凍囉,佢令令頭?大概手凍腳凍卦?比隻靚鼻敏感藥過你啦,攞埋轉介信同藥單走得.

離開診所過李家誠診所約期.

過到李家誠耳鼻喉專科,交過預約紙等叫名,無聊望吓啲告示.

嘩!大鑊鳥,本門診新症排到2016年12月,大埔那打素2016年3月,哈!食蕉都得囉,有命再見把啦?

終叫名聽講,兩院專科就咁,油麻地就快啲2015年8月,制唔制,油麻地無問題,係要你自己去約,資料傳真都得喎,穩陣啲打個電話油麻地診所,問清楚時間同要什麼文件先?才是10點半鐘,還有時間,先行回家再算.

 

回家10點45分,上網摷摷料,位置同搭乜車方便,11點鐘同老婆齊齊出門,樓下大堂遇見肥婆食蕉頂更,問佢對腳消炎藥怎樣,佢話得呀?問佢食咗幾多呀?兩排食咗一排,咁就留起看門口喇,趕時間都唔多傾走人.唉!我就幫到你,又有誰能幫到我呢?

出到巴土站11點鐘,剛好有部新線278x,問句車長油麻地差館啱唔啱呀?佢無乜笶容答中央郵局啦,咁就上樓上揾位坐,條線經針山隧道,好快出隧道,頭個站就係砲台街,診所地址正是砲台街,嗱淋落下層再問司機,唉!老人痴呆,油麻地差館講咗灣仔差館去問,佢好唔客氣話,部車不經灣仔喎,唉!才知自己衰老人痴呆,唔好意思係油麻地才對,由於兩館實在太老掉亂咗?佢都係咁話,中央郵局直落便是,當第一個站到,原來佐頓道砲台街口,一樣米百樣人,原來司機個格係咁,吱都唔笶,到站都提醒我下車.

下車向下行,好快便到診所,才是11點半鐘.

 

入到大堂,三部聶一部維修,診所太舊,聶又慢,上到去不用排隊,新預約登記須時,後便條友心急,我差不多做完,窗口細細,竟然不急及待,伸手從後掟張紙同身份証入去,個職員打個特,問乜事?我有點勞氣,嘩!駛唔駛咁心急呀?職員話唔好嘈?我會做,大概怕我同佢生事,我搞掂後,條友同職員傾兩句,睇住佢搭聶走咗,大概搞錯部門都似?

同老婆坐陣唞順條氣才離開,部聶老爺到無人有?又慢又人多,等聶不在話,層層停,要開關多次才下一層,下次來時候行樓梯好過.

離開診所,前面便是玉器市場,又行吓,非我物類,經過便算.

喱個實際得多?13蚊個燒肉飯有例湯.

診所後就油麻地差館,夠老爺卦?

離開差館過馬路,老婆嗌肚餓,就喱間有蔡灡薟名潮洲粉麵,今日真係好橋?乜都同8字有關,食魚蛋粉坐8號枱,今早睇醫生又8號籌,專科預約又8月28日.

 

老婆食嘢就睇料唔睇價,我就睇價才睇料,結果我碗最低消費25元魚蛋粉,老婆就双拼魚蛋牛腩河35元,你睇兩粒魚蛋小許牛腩就貴成10蚊?兩位盛惠60大元,若果我早點發覺,肯定慳番10元.

離開魚蛋粉麵向旺角行,間戲院名真隱蔽,裝輪才知叫百老匯.

再行便果欄,

果欄還以為平?望吓都幾拿俐.

 

隔鄰就係油麻地戲院,好似從未入內看過戲?

企陣都好多人問,幾時有大戲睇,最快1月8號喎?

離開兩舊嘢一路向旺角行,行最有興趣係街市,行到最多海鮮賣奶露臣街,都係有睇無賣,過埋亞皆老街,最多平生果賣廣東道,都係忍手無買,買咗兩磅栗子算數,老婆就買香,我對腳以經行到吹不消,要響入家啲廢紙皮度坐等老婆,老婆終於出來,買咗66蚊元寶蠟燭香喎.

諗起廁所水箱,不如去砵蘭街碰吓運氣,行得我cc吓,來到喱間潔具鋪,終於找到適合卦?不過好貴一舊仔嘢80元.

 

間鋪好醒目,放晒各款配件落一個水箱度,不用多費唇舌,啱就開聲交貨比錢.

跟住行去彌敦道茘枝國道搭巴士,見到麥記須然要撐幾層高,c就c幾大上去坐吓,對腳實在好唔掂,同老婆一個餐,一杯雪糕31蚊,老婆話新嘢好味道喎.

坐夠歇夠3點半鐘,落樓下巴士站搭車走人,巴士站人多,排隊亂七八糟,問清楚原來老婆排錯隊,連佢前面個呀婆都排錯,於是排番正,呀婆79歲住白田,好健談好好傾,見佢講啲仔女好開心,等咗廿分鐘部車才,嘩!部新車連電視都未按裝,新車特別醒神.

 

返回自己屋邨都4點半鐘,街市買點菜.

買有4片方包4.5蚊,西菜5.5蚊,韮菜2蚊,雞蛋5個5蚊,栗子旺角買兩磅17蚊.

回家都5點鐘,個女以經出街,留下三包中藥,係個女見我耳嗚嚴重,頂我唔順走去執三劑中藥,中藥係針炙時食開的,照單執三劑120元

 夜還是我來煮飯,有雞蛋食一隻1蚊,韮菜2蚊,西菜5.5蚊,豬柳梅一件4蚊.

 

韮菜蛋

 粟米豬

 炒西菜

 兩個人食,今餐盛惠13蚊

今日消費看醫生45+魚蛋粉60+麥記31+水箱配件80+中藥120+買餸34+車費17.9=387.9元