睡來唔錯,鼻水少許,老婆放假,屈屈在家,下午茶娛樂城,老婆牙痛莞茜湯,晚飯人齊5個人食.

昨晚一條友食完餐飯,11點零都瞓,唔係咪攰得滯?遲遲未能瞓著,直至佢哋齊嚟,議論紛紛下,又話買咗乜買咗勿,我才慢慢瞓著,一覺今早8點零醒,去個所笠個耳筒聽千禧年代,還是書局失踪案,老婆放假亦瞓醒,話牙痛喎,我話麻辣花生食到咯咯聲,有乜辦法唔痛吖,老婆起床,我亦起來,鼻水有些,睡來唔錯.

起來一枱零食,洗個面番熱木耳漿食,稍後同老婆齊食早餐,早餐老婆咖啡,我鮮奶麥皮,依然食饅頭,上陣網,搞掂一切,辦大事,望吓個市又跌成400幾點,唉!都係無眼睇.

又10點半鐘,老婆搞衛生,我就上網,上無可上便看電視,股台都係無眼睇,無聊就轉去港台立法會直播,又睇啲拉布戰,唉!唔悶C才怪,剛好莫乃光發言,聽佢講嘢真係獲益良多,真係有料到,可惜講咗無耐,以經有議員出聲,曾玉成都慣晒,點人數係咪?咁又要停15分,其實莫乃光都知道,除時要停,所以佢講得好急,希望能講多點卦?陰謀論點我唔識?總之咁拉法,比著我肯定劈砲唔撈.
兩點多老婆清潔好個廚房,諗住出街食點嘢兼買餸,個女又話跟住嚟,老婆話去飲下午茶,咁就娛樂城.

坐輪食輪個女找數150多蚊.
茶後以經4點多,行商場同街市,藥房買洗手液三支裝37蚊,藍威寶27蚊,鮮奶兩包18蚊.
個女買的有檸檬5隻10蚊,獨蒜兩包26蚊,三個竹茜6蚊.

街市就買有生菜6.5蚊,莞茜5扎10蚊,皮蛋兩隻5蚊,魚肉13蚊,茶瓜3蚊,花蒼魚仔15蚊.

返歸又6點鐘,各有各處理嘢,老婆處理買來的菜,個女就整佢啲黑蒜,我就上網寫我今日blog.
 夜老婆煲落佢牙痛莞茜湯,又栗子炆落半邊雞,我來蒸魚同淥菜.
栗子炆雞

麵豉蒸花蒼

腐乳灼生菜

魚肉茶瓜皮蛋煲莞茜



  人齊5個人食.