我的心臟病歷程(3) 一 疑似心臟病.

 我的心臟病歷程(3)一    
自從2006年5月2日搭橋手術後至今4年多,相安無事,到今日似乎又來過?
2010年9月8日   疑似心臟病發
在家相安無事,去到中午12點多鐘,番熱啲隔夜飯餸食,突然胸口好翳悶,左邊髆頭軟晒,有點唞不過氣,扒完兩粒飯,有點好想去睇急症?後來拿支以過期永保心靈噴劑,俐底噴兩吓,(即俐底丸)之後慢慢鬆番些,心諗都唔知係咪心臟病發?

2010年11月6日    情非得己急診
自從9月8日突然胸翳悶,到現在兩個多月,都相安無事,今日整天不是賭馬仔便煲劇,到夜晚8點多鐘,老婆在填表,有點唔明白?於是埋去睇吓,睇咗陣就心口銀住銀住痛起來,於是坐下飲啖水,大約4分鐘,不如試量血壓,129/84-68,血壓比今早144/91-75還靚?但係今次比8月9日明顯痛得多?唉!都係唔好搏,要去急症室?
威院新醫院大樓
於是同老婆的士前去,在的士途中又無咁痛?去到威院急症室2130,原來係新開大樓急症室,100元診金登記好,初診部放下份表,就大堂坐下等叫名.
大堂病人很少,等咗兩三個便輪到初診,坐下護士問兩句病情,便量血壓,上壓竟然160幾?跟住做心電圖,然後分流到緊急等候區.
好快便叫到名,18號房見醫生,醫生問過情況,看過心電圖,說似心臟有事?叫含俐底丸,要留院喎?跟住叫人推我去26區,進一步自療區等上房.
進一步自療區等咗好耐,護士才拿粒俐底丸來過我?心諗若然要瓜?都瓜咗LU?含住俐底丸就等上房.
一等再等
又係等咗好耐,醫院要等候?我都習慣,但左右隔鄰病人同家屬,等到媽媽聲.
等咗好耐,有個姑娘來叫我們自己去交表?矇查查的我們?老婆推著我去,行咗一半,醫院個呀姐叫住?問做乜嘢你哋?老婆話交表上病房囉?呀姐才話一個去交表得啦,跟住呀姐推我返回等候區.
就係咁一搞,成0015才推我上10樓C.27號床.
進入10C27病房
換過醫院衣服,當時實在太夜,老婆問聲姑娘用不用等醫生,姑娘話太多人入院,醫生忙都唔知幾時到,又你先生咁精神,叫無謂等喎.
醫生忙深診
老婆走後姑娘叫瞓住先,有醫生到再叫醒我喎?半瞓下到0315,醫生來拍醒,問過情況,聽筒探過,說唔多似心臟有事喎?話等陣抽血,同做心電圖喎?
醫生走後,4點20抽血員抽血,跟住不久來做心電圖,之後就矇矓到天光.

2010年11月7日     入院翌日如廁嚇襯
半睡下晨早7點鐘以經醒,燈光超超掁眼,護士不停穿梭派藥,同病人量血壓,起來梳洗,手巾牙擦還未有,為有手指當牙擦,雙手當毛巾,梳洗後早餐,肉碎粥一碗,非常難食,食半碗以經係咁先,藥就食回平時食開的,吃後辦我大事,事後善後稍為則身,他媽的突然山洪暴的,屁股都被弄濕,唉!原來自動感應,又會咁先進?
明天可出院
0900醫生巡房,新醫院大樓設計好唔同?一層好大病房,中間係醫護人員辦公地方,外便圍繞著一格格病房,每格病房有6張病床,我格就23至28床,我就27床.
醫生從23床睇起.一路輪到27床我,話我心臟無事喎?又話同我驗多次血,再係無事,明天可以出院喎?聽見鬼咁開心?開心得滯差點忘記我血壓?我話食咗藥,血壓重係好高?佢話幫我跟進喎?
不久抽血員來抽血,抽完無耐又心電圖,血百無聊賴睇電視,病友吹吓水,又一個上午.
洗手液沖涼,無飯食.
12點鐘個女來探,帶來日用品,個女走後2點多鐘沖涼,發覺沖涼液無帶來?真大鑊?為有用醫院洗手液,谷鬼氣連頭都洗埋佢.
到晚飯個個食飯我食粥?粥極之無味,於是揾姑娘問下?姑娘話等陣會有?誰知等極無咗件事?唉!是但啦,食兩啖望吓枱面張餐單,寫住係粥喎?即係無搞錯?到5點多老婆同個女到,買有麵包,還好有麵包頂肚.
老婆共女走後,8點多鐘,醫院有鮮奶餅干派,問要唔要?當然要,成晚流流長,有啲嘢咬吓都好.就係咁望吓電視就結束今晚.

2010年11月8日   夾手指
一覺瞓到7點鐘醒,少有瞓得咁好,梳洗好回來,以經輪到量血壓135/95-82,跟住夾手指?夾咗陣,姑娘話夾得不好,要夾咗幾次才OK,多口問句?有乜作用?佢話度含氧量?我話傷風鼻塞有影響?話有架?,之後早餐,一碗毫無味道肉碎粥,為有食老婆買來麵包.
院出不得,觀察多日
0910醫生巡房輪到,又話唔出得院住喎?叫明天喎?又話出院後會同我按排一啲測試?又話加多隻藥隻過我?我話昨日粒傷風藥都唔掂?鼻塞鼻水依然?佢話同我轉過第二隻喎?
無聊望股票
0945量血壓154/91-70,又係高,跟住來抽血,百無聊賴就睇電視,咁啱股票台,又聯絡個老婆,想話買番些少,老婆話副眼鏡漏咗響醫院?咁就無得買?
肚餓掃清光.
就係咁整朝望住個市,又12點鐘食飯,哈!今餐有飯食,大概姑娘改咗餐單卦?有翠玉瓜同唔知牛肉定豬肉?毫無味道,肚餓無偈掃清光.
電圖呀姐好禮貌
1點鐘呀姐來做心電圖,呀姐好禮貌,好好人,1355量血壓143/90-71依然都係差,跟住見姑娘派藥,但無我份,問聲姑娘?我啲傷風藥?未到喎?後來等到3點幾鐘才有.
撳電視被人閙
1800探病老婆到,有湯飲鱷魚肉湯,見電視股市收,於是去轉台啦,無搖控用手撳,好日唔撳吓,鬼識咩?26床病友教路下,上個下個去撳啦?突然有把女人聲?有無攪,醫院個電視係你撳嘅咩?撳壞咗你負責得起咩?撳壞咗其他病人無得睇,一輪咀係咁罵?來得突然,反應不及駁佢,要撳揾護士撳啦,他媽的,嬲得得我吖,好我忍你.
條八婆走後,才醒起隔鄰房啲病人,又咪係咁撳?又唔見你罵人?連病友都話佢過份,見明天都出院,都費事勞氣.
宵夜牛奶餅干
到8點鐘同28床條爛賭鬼傾到入晒神,呀姐來派牛奶同餅干,哈?竟然係條八婆,都唔鬼睬佢,佢竟然敲枱問要不要,我話要,佢老味吖?斟咗半杯,佢話無喎?轉頭睇吓重有無喎?心諗八婆你又搞邊科?話之佢繼續同28床傾波經,到條八婆返來,又話有奶多,斟到一滿杯,重話襯熱飲啦,一於睬佢都儍.
條八婆內疚
飲埋杯奶食埋餅干,唉!明天出院,都唔知沖唔沖涼好?見無聊都係沖,重換埋套病人衫.
沖完個靚涼,返回病床10點多鐘,咁啱望住出便走廊,見幾個呀姐收工,其中條八婆,竟然望著我點頭打招呼?我又邊為意吖?過後心諗?可能條八婆覺得罵咗人,唔安樂都似?
這晚早早關電視,早早便瞓.

2010年11月9日    欠藥
昨晚睡不好,整夜失眠未瞓過,0700起來,梳洗食早餐,姑娘派過藥,發覺少咗粒亞士匹靈,問姑娘補番粒,早餐還是淡而無味肉碎粥,食咗半還是老婆買的麵包.
出院,另類檢查
辦過一切事務,8點多鐘醫生以經到巡房,由23床起睇,9點鐘以經睇到,一句說今日可以出院,又話出院後比些另類檢查過我,叫我出院後去預約排期,又話加咗啲藥,原有藥就照食喎,又差點忘記要支喜療妥,係對玻璃手用來去瘀用,最後同醫生講,我重係久久銀住痛啵?佢話年紀大,係好啲喎.
自己出院
老婆要番工,出院都係自家來,11點多出鐘接過護士出院單,藥單,檢查預約紙,同病友醫護員人員說拜拜.
出院取藥方便
一樓繳費處交單找數,住院三天300元,收銀員問藥單呢?我說不是過李家誠嗰邊藥房咩?佢話唔係,就喱度對面攞藥?交過藥單打個P印仔,就對面交單,等咗陣以經有藥.
心臟超聲波
離開過舊大樓預約排期,唉!鬼暗眼,行兩轉都找不到個牌?為有詢問處,鬼咩?個牌細到見唔到?交過預約紙,叫外便坐等叫名,等咗陣便叫到,見到個白色帽護士,膊頭兩條紅間,大概護士長卦?嘩!啲房間好細,重細過籠屋劏房,得張床仔?叫除鞋上床,原來心臟做超聲波?搽啲潤滑劑,捽完一輪叫出便等.
運動超聲波,明年7月
等咗陣姑娘叫到名,給我預約我紙,一望2011年2月22日,0930運動應激心臟超聲波檢查,我話唔係嘛?出年7月才做?我話踩單車簡單啦,我成日都踩啦?嘩!個疑似護士長好勞氣話,咁!你做定唔做吖?我話做,跟住個普通護士同我解釋,唉!是但啦,接個排期紙走人.

總結三天毫無頭緒,不知乜回事.