生涯(26)1984/10/18～1986/03/15沙田第一城,五期第48座地盤.

1984/10/18～1986/03/15沙田第一城,新輝建築公司,第五期第48座地盤.

西安旅行回來,揾食關係,無奈至電過4年前上司,就係1980年沙田第一城第一期,第14座舊上司黎華賓,當年佢做助管,現在以經大概係老總級.

安排下同樣沙田第一城,還是新鴻基期下新輝建築公司,第五期第48座,職位平水,日薪108元.

一做就一年零五個月,就辭工無做,期間難忘事.

跟我條友

跟我條友仔,夜間做保安,日間走來跟我做墨斗仔,可能夜更有得瞓掛,佢重話原本佢做開墨斗王喎?不過夜晚要返工,費事傷腦根,做跟尾不用孭鑊喎?

單車代步

嗰時我住得近,早午晚都踩單車返放工,中午還家裡煮埋飯食往返,衰野見我踩單車返放工,佢又學我踩部靚單車往返,鎖響第一城已入伙大廈單車位度,結果有日被人偷咗,得番個頭轆,興得佢紮紮跳.

電腦

條友嗰時有部電腦,可能玩到厭,借過我玩,嗰時叫做第一次接觸電腦,乜都唔識?叫做人撳我撳.

偷嘢

條友住美城,個大佬揸的士,屋企裝修,夜晚同個大佬,揸部的士來地盤偷地台磚,載到部的士車尾揼晒,好衰唔衰遇警察斷正,自此就無見佢返工.

賭錢

地盤終於完成,日日返工打咭,就無事做,唔炒大概留人,等收地盤開工?成班友日日圍住賭錢,搞到我孭咗個助管幾佰蚊債.

兩便收人工

一路係咁等,去到1986年3月3日,我外便揾到工,就係其士建築公司,黃埔地盤,連同跟我個墨尾一齊,於是乎叫跟我條靚,返工先行第一城打我倆人咭,然後返來黃埔開工,我就黃埔地盤打埋佢咭,就係咁二人收兩便人工錢,就係咁,結果打咗12日咭,第一城商場要開工,我倆就要取捨,結果放棄第一城,選擇其士建築公司,黃埔繼續開工。