4月7日(五)睡可多夢,膝痛可以,踩轉馬長廊,茶大家樂,惠康,街市,晚餐兩人食.

2023/04/07   星期五   晴   22C

昨晚有馬無賭睇到尾,11點幾鐘瞓,夜所三劑就瞓到今早7點多醒,睡可夢多,賴床9點鐘起床.

氣溫22C涼咗,如常烚水搞早餐,0929早餐,1000老婆新抱B陸續蒲頭,個B又乖啵,主動叫早晨.

餐後辦埋件事無所事事,假期無視好睇?戇居咗輪不知如何是好?天氣又唔湯唔水?叫老婆幫手摷條褲落來,真大鑊褲頭扣唔埋,而且還差好遠?為有摷過另條,腰圍最大條,都係緊緊扣得上?

減肥無選擇,為有又踩單車,都諗住起行,諗起華仔?又問吓佢去唔去,原來響度修單車,唔去喎?休息就整單車,簡直嘥人工.

唔去我都準備出門踩,誰知電視播緊愛美麗狂想曲,套劇真係好好睇,正式做嗰時就唔多覺?套劇每人有個故事,每個都做得好.

記得當年2021年4月16日,下載咗這首愛美麗狂想曲mp3,個B剛好兩歲多啲,我就比佢聽,聽完問佢好唔好聽?響邊度聽過?冇耐佢拉我出廳,指住個電視話我知,衰豬真係醒.

睇完套劇差不多1點鐘,不如睇埋新聞才去,新聞期間新抱B有節目出街.

睇完新聞出門,車場取了單車,1330諗住起步,見有塊膠片似乎啱用,結果整咗幾分鐘,都係無用才起步.

還是以往一樣,踩去馬鞍山海濱長廊,1405踩到來長廊第一個亭.

踩到來有些微出汗,坐下wifi輪坐陣,見時間差不多,1451回程.

還是一條氣的踩,沿途好多黃花風鈴木樹,開得好燦爛.

返回單車場1524,鎖好單車,老婆以經在商場,齊齊大家樂,炸髀餐低食,都係咪搞?就食個28蚊米粉餐算,老婆依然7蚊熱檸水.

吃過坐夠上惠康,28級梯上來比上次好得多,惠康行個圈買有香蕉5.5蚊,免冶豬肉25蚊,鰈魚柳25蚊,豬腩肉27蚊同食鹽5.5蚊.

離開街市,老婆買咗三樣菜20蚊返歸.

回家1702,個仔已回來,搞緊佢啲至愛模型,老婆回來就處理買來菜料,我就嗱淋沖涼,涼後入房上網寫寫blog.1815母女返,下來佢三口子忙沖涼忙煮食.

1926老婆叫開餐,有肉片炒脆玉瓜,煎黃花魚,同老婆兩個人食.