生涯(17)偉成建築公司1977/09/25~1980/02重返世界花園

1979/05/03~1979/11/21重返世界花園

洛克大廈完工後,所有墨斗掉回世界花園地盤

網上圖片世界花園

世界花園一時間墨斗多過乜?剛位無法安排,個個遊手好閒,蛇多過做,有些返工後亮吓相,便各自找地方蛇,有些更加都走人?而原有做開的,亦多咗啲新墨斗面口,連地盤下便檔茶檔,姓羅個太子都上咗來做墨斗.

就係咁一做,做咗半年,11月21日就要離開,被掉去大埔康樂園.

期間發生好多事,不過好多都忘記了,剩下的最深刻的,可算是最難忘.

公司一天遊

公司不知何故搞咗個船河旅行,都忘記去那裡?船到沙灘拋錨,啲友紛紛游水到沙灘,我就懶醒諗住跳水而下游去,在船爬到最高處,一躍而下,唉!嚇得我C,原來水係咁淺?對手已經觸及個底,好彩無事.

到玩遊戲,最好笑幾個墨斗連我都興穿涼鞋,遊戲要單腳跳,匙羹運送乒乓,跳時涼鞋打上腳踭,打到啪啪聲響.

偷蕃薯

由於工作太閒,無王管,而地盤下便一帶,政府收回農地發展,即現時(隆亨邨)一帶,有人提意落去睇吓,睇吓啲荒廢農田,有無筍嘢執喎?於是一行5,6個墨斗,田基路行,沿路好多荒廢村屋,見有狗隻吠,但吉屋所見無人?擺明人的棄狗而去,狗之忠心,人一行近,狗就吠不停.

5,6條友浩浩蕩蕩走到一幅田,一睇便知蕃薯田,幾條友望住幅田,心諗有無人既呢?跟住黃勝一聲掘喇?嘩!幾條友翻土機一樣,幾吓手勢,就掘走一面盆蕃薯,跟住有條靚仔大嗌?塊田我哋架?

我哋無理會?拿住盆蕃薯走人,好衰唔衰條靚仔跟到實?又唔捨得盆蕃薯,於是乎拿住盆蕃薯行遠些,兜個圈走去紅梅谷新田圍嗰邊返地盤.

返到地盆比老總罵,原來條靚仔早就知道,我哋係世界花園地盤,一早以經來投訴,後來放低盆蕃薯,佢來攞番無事.

尷尬

有次公司請飲,大概係六月十三師傅誕啩?宴設港島,都忘記那間酒樓?同工友何基偷雞早收工,走咗去沖涼揼骨,誰知遲到?趕到酒樓,公司已經開晒蓆,兩條友一出聶,見咁情況?面懵懵咁嗱淋走人.

旅行泰國

同事人王全住沙田,日日返工都係徒步,好喜歡單拖旅行,週時回來大講旅遊經,大都是東南亞,聽得多我都心郁郁,從未出過埠我,最遠都係澳門,見工作閒,於是乎請假,經佢介紹下平靚正,就選擇咗星晨旅遊,泰國曼谷巴提雅七天團,團費1650元,出發日11月9日.

好景不常

唉!泰國七天係好玩,參觀過玉佛,金佛,卧佛寺,皇宮及鄭王廟,巴提雅射過長短火,還一槍中的,

獎勵一槍,玩過降落傘,坐過快艇及香蕉船,騎過水上電單車,可惜非自駕,去過桂河橋,坐過大笨象,睇過4級真人騷,按摩就無去過.

七天完畢後復工,唉!架步內滔滔不絕講旅遊?遇著老板巡到?大鑊?一班在內者,都要充軍,1979年11月22日被調去另一團隊,大埔康樂園.

網上圖片,建成後的康樂園

生涯(16)偉成建築1977/08/12~1980/02/,駱克大廈

駱克大廈1978/3月~1979/5月

由於偉成有新地盤,公司可能體卹我居住近啩?便掉我來這裡,地盤有兩座.

而隔條街後同樣是偉成地盤,同時間興建,建成後就是伊利莎伯大廈,地產商同樣是長江實業,只不過地盤老總唔同,團隊唔同.

初來步到地盤由地基開始,地盤管工姓賴,由於地盤隔鄰是舊樓,開工時要挖空做地腳,怕隔鄰舊樓地台會下陷,於是先行來灌漿加固,弄實之間坭土,誰知灌後舊樓地渠塞咗,舊樓住客過來問點搞?問我們管工貴姓?我們管工就答佢,我姓賴,就係咁變一時笑話.

後來渠塞終於解決,而賴姓管工不久就辭工無做,後來來了個新管工,同樣做咗不久又無做,可能地盤太趕,壓力太大,頂不住要走啩?再後再來了個叫陳振,係偉成啲老臣子,而梁國輝下,我大佬來埋做助管, 而梁國輝個細佬都來埋,初入行做我墨尾,條友智商有點低?人手欠缺下,我亦介紹在雄裕時做管工的,余景棠來做墨斗.

地盤開行工,最大陣像就係個大地腳,地盤咁大地基就咁大,而且好深好厚,鋼根就密麻麻,又粗又大條,墨斗要嘜位,面層鉄過密,柱鉄插不下,要用風煤切割,太忙太趕關係,週時忘記鉄還未散熱,一手拿落去,手都燒焦.

到落石屎嗰日,重大陣象,地盤三面馬路,放滿石屎揼車,又釘了好多條落石屎斜橺,距離遠就用揼車落,近就用斜橺落,石屎田螺車就不停地穿梳,落石屎新舊口不能相隔太長時間,橺落揼車落都要連貫性,終於由早落到晚,做追石屎車的,做拿震筆的雜工,做睇落石屎的我們墨斗,及落石屎啲工人,簡直疲於卉命.

地腳落成後,就輪到上蓋工程,工程太趕,要做到五日一層,開夜就必然,人手又必要,日間落好石屎以經傍晚,石屎乾幾成以經墨斗跟圖開線,稍夜點扎鉄佬就進場,楝柱鉄風力墻鉄,第二天就釘板佬開工釘板模,第三天就扎樓面鉄,第五日又落石屎,就係咁頻頻開夜工.

工程就係咁,循環又循環,而人手又變動亦大,有來有離開,過程都變化好大,而難忘事很多.

女兒出生

地盤開工不久,我女兒亦剛出世,工程忙滿月餐飯,都係就近駱克道間酒樓食算.

彩電

而部黑白電視宣告打柴?而部樂聲彩色18寸電視,兩兄弟用兩期開夜錢,就捧了返歸,嗰年重係世杯足球,阿根廷主辦兼捧杯.

最震撼一次

從事建築以來最震撼一幕,樓建到拾多層高,當日落樓面石屎,整層樓面積不大,樓內大通天得一個,而且面積頗大吓,落石屎一路落到來通天位,自其然兩女工走上通天位,但趕工關係,扎鉄佬啲鉄料,提早準備亦放在通天位,等待石屎一乾就開工,而女工洗鋼筋用的大油桶水亦放上去,又釘板佬的鋸床工具亦放這裡,個通天板模結構,只不過四面橫位,釘一條長板,放幾條木枋上去,用來乘托著,我在石屎乾部份睇落石屎,突然0隆一聲,整個通天台負荷過重,下陷跌咗落去?兩個女工迅速消失.

我即時迅速樓梯落下層,一望個爛口女工騎在打晒交加堆竹度,係咁叫呀媽?竹係從下層室內窗斜斜地豎上來的,準備搭上一層用,見佢即時無危險,我就大聲說你無事,不要郁.

而另個稍肥女工,正在企響卡板上移動,我就喝住你唔好郁,由於女工腳下係最後卡板,再行差一步,再跌就直落拾多層地下,後來我入去慢慢帶她出來.

而騎竹個爛口女工 我才扶她下來,下來後個稍肥女工頭有些血,我就扶佢落地下,地下員工送佢去醫院檢查.

後來個稍肥女工復工,係都要給我利士?

黃勝

地盤有個拍擋叫黃勝,在大陸最艱難時期偷渡下來,有時傾開佢啲大陸往事,都幾悲慘,形容自己生日,改為偷渡下來嗰日,做佢生日作紀念,可想佢幾刻骨銘心.

暑期工

地盤趕工,突然來了兩個中學生暑期工,做跟墨尾,一個姓蘇叫衡房,一個就忘記了,所以話好笑的特別記得,我問呀黃?有日你結緍你會否請呀蘇衡房呀?個個笑到七彩.

其實另個暑期工好叻,好有志向,佢話要一個暑期間,要學會墨斗份工作,相比下同姓蘇的,思維進取多.

新移民

又有個新移民跟墨尾,係個蒙古仔移民,佢問我在香港多久?我話香港出世,你話多久?佢竟然咁講?嘩!乜在香港咁耐都未買到層樓?吓!我都唔識答佢.

就係咁5日一層的做到1979年5月3日,地盤宣報完成入伙,而我又被掉回世界花園.

生涯(15)偉成建築公司,1977/08/12~1980/02/世界花園

偉成建築公司

沙田世界花園1977/08/12~1978年3月.

現時的世界花園

離開裕雄建築,大佬個朋友梁國輝,介紹來了這間偉成建築公司,職位墨斗王,長工月薪1500元,年尾雙糧,兼一個月花紅,即是連底三個月糧,過年就和味.

上工後被派去沙田紅梅谷世界花園地盤,當年世界花園前面條紅梅谷路還未有,返工一早由霎西街落灣仔,再轉104隧巴到白田邨,南昌街下車,然後再轉87瀝源邨巴士,到獅子山公路,隔田村下車,才步行到地盤.

記得第一天來報到開工,地盤寫字係木搭兩層二樓,當時我剛上到寫字樓,突然從後衝來一隻狗,嘩!勢兇夾狼係咁吠?當堂郁都唔敢郁?跟住個機房大偈上來,叫住及拉住,我就舉起雙手唔敢郁,一額汗後來才知道樓下層係機房架步,係大偈昌飬有幾隻布爹利狗,才認識到係英國名種狗,鬥牛㹴.

做落後有人笑大偈昌,話佢啲鬥牛㹴得個樣啫?大偈嬲起來,有日在英泥倉,啲友拉來一隻黑唐狗,樣子都好兇吓?而大偈昌就拉來隻布嗲利,我哋就揾定啲有利位置,隻布嗲利一見隻唐狗以經胡胡聲,大偈昌拉都拉唔住,結果一鬆,兩隻就打起來,沙塵滾滾下,名狗即係名狗,隻鬥牛㹴咬住隻黑唐狗唔放,唐狗就鶯鶯聲叫?大偈昌點叫點拉都唔放口?大偈昌早就拉定條水喉,用水係咁射,鬥牛㹴才鬆口,嘩!隻黑唐狗一支箭咁消失.

來到世界花園,真的另個世界,地盤依山而建,開墾咁多就建咁多,來到已經有兩座建成入伙?開山做沉箱做地腳,週時有蛇出現,仲好大條吓?週圍農田處處,紅梅谷近距離見過水牛耕田,地盤荒蕪,中午餐飯,公司搭有飯堂請有個女工煮飯,食就續餐計?

來到世界花園地盤,認識到一班年紀相約工友,個個玩得做得,工作齊上齊落,要玩亦齊齊玩,好多難忘事.

地盤山長路遠,地盤打咭後,便就近紅梅谷即是現時新翠上啲,木搭士多茶檔早餐.

餐後才返回地盤正式開工,世界花園代工型式興建,實報實銷,偉成抽佣興建,而墨斗平水行業,可以講搞掂啲平水墨線,各行無投訴就無王管,簡直係份蛇王工.

齊工作齊玩耍,工作每逢落石屎,要晨咁早返地盤開線,跟圖則彈好墨線, 便齊齊落山,上下口徑村,搭村巴到瀝源富瑤酒樓嘆早茶.

工作有次樓內放地墨線,條釘板佬,在頂層開工,竟然走下來開大,而我哋要掃淨個地下才開墨線,條友竟然唔生性在此開大?谷Q氣幾把掃把齊齊掃過去?沙塵滾滾,直攻條友,攻到條友褲都擾唔切走.

地盤賭錢就例牌,中午飯後就牌九,成伙墨斗對個釘板三判,釘板三判洪財勢大,吓吓頭門買起,墨斗為有夾份來對賭,輸咗就牙較輸埋,當班墨斗贏咗,就話拆佢板模,佢贏就話食墨魚仔,我就最反斗?最多金句?我哋有個師兄叫黃立德,我哋贏咗我就講句,呀黃 𩶘得,釘板佬贏咗重串,買定啲罐頭墨魚,當我們面前開罐墨魚仔食,大大聲話食墨魚呀.

有時三點三就地盤茶檔,就翠地盤散工唯一早午兩餐都這裡,茶檔木搭擴濶,紅梅谷真係好多蛇,週時飲飲吓茶?眼白白出便成條蛇掛在樹上?幾條友有時三點三後打幾圈,一直打到日月無光,夜嘛嘛才走,幾條友靠燒報紙照明,駁住駁住照著走,又怕有蛇,雞咁腳走出草叢到馬路.

現時木屋還依然在.

智同道合幾條友,更不時出尖沙咀,芬蘭閣沖涼揼骨,芬蘭閣高級場所,都係啲友帶才見識過,以前大學站馬料水還未填海,成班友去釣夜魚,結果魚毛都無條.

有次泥水判頭管理肥四,有日聯誼吓我哋,請我哋幾個墨斗,去食韓國燒烤,當時來講好新鮮好時尚?好難得第一次嚐試.

又有次好難忘,就老婆在家,被人上門推銷高級餐具,先行送張有齒小刀?老婆上鈎薟咗?要月供餐具,錢都唔少?我回來知道後,西餐具又貴,對我們來講,又有何用吖?還好我上間公司理論,結果被我講甩.張有齒小刀,直用到最近才用斷掉咗.

1978年年頭,大約3月,公司有新地盤,有掉動,就咁我就被掉去灣仔駱克道441號,同我住地方相距,大約百米多些.

建成後的駱克大廈.

生涯(14)雄裕建築公司1976/09/25~1977/08/

馬可尼道6號,1976/09/25~1977/8/?

1976/09/24離開聯益建造,同樣師兄桌謀介紹,來到間雄裕建築公司,職位墨斗王,長工月薪1200元,地盤九龍塘馬可尼道6號.

雄裕係間好細公司,由三個老細合股經營,話事個姓李,第二個叫X雲鋒,第三個叫呀龍哥,架構好簡單,公司一間,地盤一個,文員一個好多理論,地盤管工一個姓余,墨斗王就我,跟我墨尾一個叫呀凡,看更一個,還有個遊手好閒,係老細個親戚喎?

地盤來到就起上蓋,由1/F開始興建,一路到結構完成,到泥水粉飾,樓高8層連外圍全部完成,做咗11個月就工程完成.1977年8月就拜拜.

期間都有些難忘事.

由於公司細,工程少濕碎,像一隻半隻鋼窗,十萬火急要裝,好多時判頭未能及時派人到,老細就按照判工價錢,給我同呀凡搞掂佢.

最過癮就係浴缸,人工雲石做浴缸,總動員幾條抬上樓,結果樓梯未上,在梯間每人拿住手一塊仔,整個浴缸散晒落地?能原隻搬得到上樓的,就聊聊可數,這種人做雲石浴缸太易碎,結果要用過另隻浴缸.

地盤埋尾,外圍好多後做嘢,石屎,欄河,柱,花槽同擋土墻,釘板落石屎,都係我一人搞掂.

最為難忘事

最大鑊有次釘板,釘擋外圍擋土墻,擋土墻有PVC梳水筒,個咀斜同尖,一隻從高處跌下,剛好揼中我左手手指趾甲中間,當堂一粒藍寶石(瘀血),鑲嵌在指甲中,血流不通,像秒針一樣跳吓跳吓的,過不得?痛得我攞命?後來回家用針,一吓一吓的在指甲邊挑,挑穿指甲底啲肉,然後放走粒瘀血,才舒服晒.

地盤尾聲,中電電纜入屋,係中電負責由街地底,經沙井引條電纜入屋內火牛房,係中電負責的,誰知中電來試兩試,就話通不得?要我們加沙井?加就要打地台,開0隆挖氹?多咗好多工程,後來我們總動員,連看更都幫手123,123,123,整條大電纜舞咗入屋內,班中電友不用郁手,就收了這單工程費.

最難得三個老細中龍哥,當時住霎西街,又避業主迫遷收樓,住屋困難租又貴,龍哥認真幫手,幫我揾木屋買,來等上樓,帶我去過黃大仙木屋區,沙田瀝源木屋區,還建議我買隻艇,搏上樓喎?可惜無成事,但咁既老細認真唔話得囉.

地盤五台山,明星多,見過佳視時鄭裕玲,呂有慧,黃淑儀,個個都好靚女,而黃淑儀同劉芳剛就住隔鄰大廈,又見過許瑩英,叫聲英姐都好禮貌回應.

建成後的馬可尼道地盤,裝過修後以經不一樣.

生涯(13)聯益建造公司1975/9/11~結婚～1976/9/24。

1975/09/11～1976/09/24

由於堅尼地城屠房地盤,師兄桌謀去咗間叫聯益建造公司,地盤請人於是乎離開麥章記,做回本行墨斗.

地盤在灣仔軒尼讀詩道,408號,建成後就現時德興大廈,我住霎西街永德大廈,行出街口便是地盤.

聯益建造公司,係香港一間老字號建築公司,亦是全港第一家首用天秤建築公司,英文名還用著林護兩字,林護係聯益創辦人,現在後人家族經營,後人都唔簡單,林植豪,林植宣,太平紳士.

就係咁一做就一年零十三日,1967年9月24日離開.

期間難忘事.

公司好傳統,大部份長工都係老伙記,管工高佬X,聽講後生時從雜工做起,升到做管工,工程圖則就免問,問佢總是叫你跟圖則做啦?再問佢都走人,靠啲有料助管,墨斗自動波興建,地盤先生又係老臣子,攞工具要筆頭筆尾配給.

人工就30蚊日,散工,其他乜都無,叫做好過失業,跟我條墨斗仔,佢老豆在老闆家做文員,都係至親老臣子,聽佢個仔講,跟老豆老闆處食飯,寧願去工人房食喎?還好餸過老闆度喎?以前啲有錢人,越有越慳.

人就係咁?越近越返得晏,越遠就越早?日日返工,返到成9點幾10點鐘,墨斗份工就咁,搞掂啲墨線就話之你,除非公司吓吓管住?都係需求問題?需要到你,你就真正墨斗王.

冇耐師兄有高就,就唔撈而去,剩下我担大旗,要留低就要找幫手,以為朋友介紹個墨斗王來幫忙?唉!誰知係來呃錢,同墨斗仔無別?變咗拖多個跟尾,太古孱仔角無嘢撈,以為拉佢來做墨斗仔,結果無心機做,不久就鬆人.

到結構完成,有人無人,工程一樣進行,工程亦接近尾聲,我亦係時候成家立室,太古時,時不時旅行燒嘢食,認識我現時個老婆,當日在禮頓道1號京寶酒樓設宴,聯益建造,福利建築,太古船塢一些老友,到來飲我這杯.我結婚了,當年酒𥱊500一圍.

吳寧係我母親嗰邊,一個親戚,我叫佢做寧叔,久久才來我家一次,好高大好健碩,成個標準運動員咁款?我13,4歲時帶我出修頓球場打藍球,佢係個泥水工人,我第一次踏足地盤,係佢帶我去佐頓道及彌敦道間一地盤開工,裕華國貨對面,

做泥水仔抽泥斗,女工開泥漿,我做抽去給師父批盪,年紀太小,兩手無力,泥斗不停擦傷腿兩則發炎,人工5蚊日,做咗兩日就無法做.

將近結婚有日,佢來地盤找我,問我借錢,身上百多元,借咗過佢,自始就再沒見過佢?聽父親講佢吸毒?

建築行業,由其散工,一到地盤尾聲,就要找定後路,散工僱員僱主7天通知就拜拜,而工程亦到尾聲,我亦找有後路.

1976年9月24日,離開。