睡來尚可,家居改革,妙手回春,大市跌甩髀,午晚揾樂哥,腳又痛過.

昨晚12點前都瞓,一覺今晨6點半鐘便醒,老婆在返工,在廳梳化賴至8點多才起來,睡來尚可,一切正常,洗個面上網及早餐.

早餐搞掂一切事務又9點半,神的晚餐,個市亦開,恆指輕微高開幾拾點,看來無乜影響卦?繼續神的晚餐,看完10點半鐘,又昅吓個市,嘩,4百幾點,犀利,走得快好世界.

話之你家居改革又開工.

 

今鋪個女個垃圾柜,遷過隔離房,喱啲碎碎濕積木切成柜,醫番都殘廢,買又無咁快,盡吓人事啦,攤開大堆工具,係咁做,一路一路諗?做呀做,一做又3點鐘,老婆放工來電,我話邊度都唔駛去,就樓下大家樂啦.

出門前望吓個市,嘩!恆指跌過千點,大大鑊,大家樂,老婆熬熬聲在等,每人食個下午茶餐.

  

餐後上惠康,8蚊執份特價蕉,街市買點菜,瘦肉一舊10蚊,茄瓜兩條4蚊返歸.

 回家又砌過,6點15分老友來電,說幫我攞咗啲料,於是落樓下收料,一望嘩!唔係嘛?咁重料?吊坦克都得,佢話地盤無輕料,無都無偈,老友有心,都多謝之至,同老友吹輪水才返歸.

 回家又砌過,個女個柜比我妙手回春,哈!又幾穩陣,勝過以前多多,打鐵趁熱,換埋早前吊柜粒香雞拉爆羅司,一搞近9點鐘,我執架生,老婆同個女就搞清潔,唉!忙咗一日,我隻腳又發作,又腫又痛.

太過夜無煮飯,拿住支拐杖趌跛跛落商場揾樂哥開餐,9點鬆啲鐘,樂哥都收水牌,好彩都趕得切,最後我們三人,特別肚餓要加飯,臨收爐廚房賣剩尾,送菜兩碟.