我的心臟病歷程(2)四 手術 薟字,搭撟手術,刻骨銘心,加護病房,出院.

我的心臟病歷程(2)四  動手術搭橋

2006年5月3日      手術前準備

晨早6點鐘以經醒,睡來麻麻,梳洗好辧妥一切事務,一切都好平靜,不久姓何麻醉師來,講解手術時麻醉情況,到麻醉師走了,我心口又開始翳,一直到中午才叫舒緩番.

由於今日約咗陳醫生,講解做術手風險同薟字,2點鐘老婆以經到,咁就等到4點鐘陳醫生才到,講輪風險同意薟下字.

搞掂後老婆外出替我買晚餐,醫院嘢實在太不好吃,住院以來大多數食,都係老婆買的,吃過外賣後,由於明天動手術,一切物品都無用,於是叫老婆拿回家,洗得就洗.

老婆走後,護士拿來特別梘膏,粉藍色膏狀,同個剃毛鬚刨,叫沖涼及剃淨啲體毛喎,搞掂後到11點鐘,護士又叫沖第二次涼.之後便開始禁食.

2006年5月4日     妹妹好心刻  

晨早5點多鐘便醒,睡來還算可以,6點半鐘沖我手術前第三次涼,為求穏陣,護士叫我含粒俐底丸才去沖,果然沖沖吓有點翳住,沖完個涼換上手術袍,趟在手推床上,等待推去手術室.

8點鐘落到手術室外便,以經有7,8張手推床病人在等待進入手術室,到進入手術室,只不過係好幾個手術室外面一個大堂,病房護士同手術室護士,互相核對病人資料,我就頭岳岳四維望,見到一個母親陪住個小妹妹,妹妹大約5,6歲,母親觸住個妹妹手,妹妹很乖很安靜,彎著身體躺著,同樣在等待做手術,此情此景有點感觸.
搭橋手術    

8點20分我被推入手術室,123轉上手術床,醫護人員在則車車咁轉,頭上8盞大橙,床尾就4盞較細燈,護士忙著而何麻醉師在我左手碗弄針,刺得我好痛,跟住到右手碗,不久我以經大昏迷.
姑娘一面都係 

到12點鐘,我以經在心切自療部,矇矇矓矓聽見姑娘說,我同你拔喉喇?聽見123就從我口中拔出一條長長的喉,跟住給些少水我飲,不久4B病房護士來接我回病房.

轉床時病房護士探頭過來,準備連床單一起拉時,我肚像有鼓空氣,從口湧出,嘔吐直噴到姑娘面額上,對不起都說不出,姑娘嗱淋去沖洗,嘩!幾咁唔好意思.
刻骨銘心加護病房

推回4B病房,但不是原有普通病房,而係另間加護病房,一共得4張病床,躺在床上郁都唔郁得,身上形然插住幾條喉,我都數不清楚?尿喉,抽肺積水喉,最得人驚係右頸則一條,都唔知乜作用,整個人僵硬著,床就斜斜哋攪起,個人瞓響度,胸口鐵板一樣,郁都唔敢郁,屁股瞓到好痛,迷迷懵懵望住對面,對面兩個病人,係早我一天做手術的病友,同樣迷迷懵懵,在閉目餋神.
十足科學怪人

到4點幾鐘,老婆同兩姐弟到,個妹同個仔同時到,由於探病限人數,我同老婆講等個妹探先啦,哈!誰知個妹一入到來,不夠兩秒,一句保重就閃回出去,唉!個妹永遠都係咁,見襯唔夠兩秒鐘,又或許我個病容嚇怕佢卦?都好等老婆多點時間,我有點嘢食吓,老婆入來餵了些自家煲的粥我食,坐了片刻都走.這晚好辛苦的迷迷懵懵渡過.

2006年5月5日  極度辛苦,迷迷懵懵兩天
昨晚迷迷懵懵未瞓過,肚依然插住三條喉,床邊有個樽,喉尾就插進內,聽見似揼揼的響,尿喉插住極之唔舒服.
兩日來每更一個護士,照顧三個搭橋病人,非常時期,又餵藥,又量血壓,騰來騰來去,真係非一般照顧,真係好感謝.
後來精神稍好,我追問姑娘,究竟那位護士,手術室推我上來,唔該幫忙同我講聲,非常不好意思.

2006年5月6日   驚心動魄拔喉
加護病房第三日,個人似乎好啲,無咁迷懵,在等醫生巡房,尿喉實在太不舒服,忍不住同護士講可否拆走,護士說今日會全部喉拆走喎?個人當堂唔同晒.
醫生巡房後,望穿秋水等到下午,終於有醫生來拔喉,首先同對面床位伍先生先拔,當日手術我上午做,而伍先生就下午才做,(這位病友伍先生,有趣故事多多,到最後我再細說)
拔喉一路輪到來,我係第三個即最後一個,條喉插在肚內,要拔出來,我真係不敢看,醫生首先拆去固定條喉膠布,跟住叫123,我就大力呼氣,一拔就大約7寸的出來,再123就整拉出,血淋淋尺多長,醫生連除按住,立即就縫針,兩個喉洞都係要縫針,其實我都乜點睇到，到搞掂我才鬆一口氣,跟住護士替我拿走條尿喉,成個人舒服晒.
輪到物理自療師到,教我如何運動,又同我穿上壓力襪,由於左小腿要開刀,取條靜脈血管出來做橋,所以一條長長刀痕,要穿上壓力襪保護.

圖片.手術後回家第5天同第8天.

離開加護病房
休息了個多小時,一個肥肥護士來,扶我轉回普通病房,係慢慢的行去,咁就正式離開加護護理,進入另個階段調理.
返回原有普通病房,今回係5號床,而對面床正好有淵源的伍松先生,安頓好後要穿上件背心衣,胸口有對大環,作用係咳嗽起來,要雙手緊握扣著,免得咳到胸口爆裂.
5號床不知否冷氣口,或係手術後個人特別凍,到晚上7點鐘老婆到,我實在凍到頂不住,叫護士call醫生來檢查吓,但又無發現什麼?
老婆走後,柯我拔走尿喉的第一篤尿,嘩!竟然裝滿一鴨仔,成兩公升,這晚好好裝備吓,放好個叫人鐘,免得病情有變,又加多幾隻鴨仔,不時之需.

2006年5月7日  夢境人頭湧湧
這晚好彩乜事都無發生,但係未瞓過,個人迷迷懵懵,手術後一次排便都無?醫生講過,手術後排便好緊要,以為今早會有啦?結果得個屁.
夜瞓不到以為日間可以瞓,誰知全是夢,夢見人頭湧湧,像假日羅湖過關人潮一樣,由於幾個同期手術病友在鄰近,傾起來大至情況一樣,同樣排便困難,瞓不得全程發夢,而伍先生就在我對面床,佢話夢見好多大笨象喎,似足非洲象群遷徙,象群湧湧喎?
瞓唔著就做運動,物理自療師每人派個玩具,係一個膠做有3個波仔在內,要用口來吸,吸到三個波仔升起到頂,叫等閒就做,吸來非易事,好在我游慣水,較為容易,而伍先生就差得多.
到探病時間,佢老婆來到更加多嘢講,更樣樣事來同我作比較,人性真無奇不有,有趣事下次才再講.

2006年5月8日  精神稍好口水多

同樣瞓不好多夢,5點鐘以經眼光光,等天光,直至醫生巡完房,吃過中午飯,不是病友聊天便閉目餋神,或吸波波.

下午醫生又巡房,還有班學生,温醫生來睇輪到我,我覺得他特別關照我,同我剪去測住心臟肚連接外條線,同我洗傷口,重新噴過防水膠布,之後同我照超聲波,睇吓我有無肺積水,講解班學生聽,話照出來一點積水都無,最後還講句very good才走.

5點半鐘老婆到,帶了些粥來過我食,粥後老婆幫忙祙祙個身,這時精神狀態都幾好,多嘢講既我,又同病友聊天,大談我心臟病經歷,講到興高彩烈時,突然有人插咀,一望嘩!係個男護士,嚇得一跳,當然不敢再講啦,男護士說繼續啦,後來男護士再講些心臟病知識過我們知.
到8點鐘老婆都走,但又忘記帶走個暖壼.

到夜有宵夜,就係餅干同杯熱鮮奶,呀姐特別關照,給我大大杯,話唔飲都倒喎?呀姐好健談,話住對面愉田苑喎?問我退生活點過?我話上網,游水,賭馬仔,買吓外匯買吓股票咁囉,見我全是上網嘢,覺得好有興趣,原來佢係電腦初學者?

吃過杯奶來次大事,好高興終於正常喇,這晚10點鐘以經瞓.

2006年5月9日  非常開心,出院回家

同樣今早5點鐘以經醒,手術以來算最好瞓一晚,起來有點便意,結果去了一次較好,好開心.

梳洗好7點鐘早餐,還未吃完,護士以經叫埋位,返回自己張床,話醫生來巡房喎?首先幾個醫生仔,續個病人睇一輪,跟住輪到温醫生來看,看完我之後,說今日可以出院,聽後好高興.
跟住又萬醫生同好幾教授級醫生到,而班醫生仔就續個病人向教授匯報,匯報後我就正式可以出院,於是嗱淋至電個老婆可以出院啦.
跟住物理自療師到,同我們班出院病友上最一課,回家如何做運動,還未講完就接住要完抽血,又輪椅落地下照心電圖同X光.
返回4B不久老婆到,由於非探病時間,同老婆又要在走廊度等出院.
去到12點鐘還未有聲氣出院,便叫老婆自行去餐廳食飯先,我就回病房同姑娘講,老婆到咗可否出埋張住院單同藥單,等我們先行找數同取藥,姑娘真係好,出埋兩張單老婆去搞.
兩點多老婆搞掂晒回來,姑娘苡靈講解吃藥份量同覆診事宜,哈哈,跟住温醫生到,看過我今早做的心電圖同X光片,說可能還有些肺積水喎?為防我肺炎,同我加多隻抗生素藥,接過醫生藥單,就同4B熟悉病友說再見,早日康復出院,跟住醫生,護士,醫護人員說聲感謝就再見.
跟住就藥房取抗生素藥,等成一小時,才的士回家.

公眾病房住院費
2006年4月24日至2006年5月8日

共15天,每日100元.

合共1500元.