睡好,踩轉恆明公園大大鑊,威院縫七針,晚飯人齊大家樂,

2021/08/07   星期六

昨晚出埋編blog睇埋奧運,11點前都瞓,夜所一劑就今晨0620,同老婆齊齊醒,個仔在返工,返工後關冷氣開wifi,返床再瞓0730醒,手機賴床到0820,手機無電起床.

起來新抱以蒲頭,諗住梳洗烚水搞早餐,見星盆面度度白泡,忍不住,指著問句新抱,佢話開奶來喎,我話用完沖沖佢吖嘛?佢才說好喎?再睇爐面又一攤水,唉!嘥氣.

繼續洗面烚水搞早餐,0900早餐搞掂上網食,0915老婆蒲頭收洗摺,0930個B醒咗在房唔願出來,到出來就靜雞雞爬上嫲嫲床,玩嫲嫲义緊電部手機.0944老婆辦妥佢手頭工作早餐,個B就等佢娘出街早餐同去玩.

我就辦埋件事,就無所事事睇電視,直播奧運無乜好睇,1140我都出街踩轉單車運動吓.

1156城河第一花園起步,1206來到石船落雨,亭仔稍等無雨繼續.

1225來到恆明休憩公園仔出便,唉!掛住望個公園,冷不提防就隊埋4條黃柱度,人仰馬翻,整個人仰臥面向天,感覺頭手無事,但右腳爆光,成兩寸多長傷口裂開,啲血湧出,嗱淋袋裡紙巾揞住,拉埋部單車一邊,紙巾唔掂濕到淋,再摷嚿紙巾,嗱淋車籃拉個膠袋扎住,叫做止得住.

然後推部單車入恆明公園內,心諗怎辦?於是手機摷吓單車醫護隊,到打去,佢話我哋唔係緊急服務喎?叫打999喎?我又唔想叫救護車,後來還是打999,同佢講我單車徑炒車,傷口流血,唔係好嚴重,想揾單車醫療隊包扎,佢話無喎,一係要救護車喎?咁就唔要收線.

後來諗吓?不如至電老婆,叫佢帶啲棉花紗布火酒入來,打咗電話老婆在途中,公園食蕉呀姐經過,好好人,見我咁情況,問須要幫手嗎?我話等緊老婆入來,就有嘢包扎,現在無血,無問題,呀姐真係好人,佢返回架步,拿啲棉花火酒紗布來,見佢拿來就拆開重新包過,誰知一拆開,血就流出,傷口嚇襯呀姐,佢話唔得,要打999,我睇回傷口成2寸多長,裂開成分多兩分?諗落去醫院都無走雞,於是叫呀姐幫忙鎖好部單車.

大約1345先來部警車,一位警察先到,杪下我資料,1350救護車到,來到洗洗傷口包扎好,我就問佢用不用去醫院,佢就話睇你咋?我就話等緊老婆到,1405老婆到,連新抱抱埋個孫女都到,個天落緊雨,咁就担著遮同老婆行去路口上救護車.

在救護車等咗好耐才開車,大約1425到威院.老婆去登記,180元又無即時收錢,賬單就有張.量完血壓夾完手指,咁就開始等,等咗好耐有醫生來睇,問有無暈?手腳試禁過,睇吓有無力.

1525有4個藍衫女護來睇傷口,討論傷口可否縫針,因為腳正面上下5寸位無肉,後來有個藍衫男護士來睇,話可以縫,叫縫入些喎.

護士走後又要等,大約1840有人來推去照X光,又等咗好耐才輪到,主要照兩隻腳.

照完又推去等後區等,等到5點多啲鐘,啲呀姐來推去房仔,以為無人啦,於是乎手機張照,誰知護士在後便,話唔影得相架,嚴重罪罰你錢架,我就話想影吓個傷口啫,嗱淋收番好.

聽見有人叫佢做Michelle,咁就喱位Michelle姑娘同我縫針,洗過傷口,打過局部麻醉針,過咗陣問我痛唔痛?我話你摸我都感覺到,佢話車,局部麻醉當然有感覺啦,我話以前搭橋無感覺喎?全身麻醉點同吖,佢話同我傾住偈等我分散注意力喎?於是驚心動魄下,等待一針一針的縫下,好驚下終於縫好,問佢幾多針?話七針喎,縫妥後問我打不打破傷風針,諗吓一打要打好幾針,唔打啦,誰知老婆在外便,大聲叫要打,咁就手臂打支,一點都唔覺打咗,等佢出埋啲拆線,洗傷口,藥單文件紙,佢就帶我去分流室,話等叫名,醫生睇過可以走喎?

企響度等咗陣,Michelle姑娘就趕啲家屬走,啲位病人坐架,然後叫我埋去坐,唉!見唔對路,叫老婆去攞藥先,我就坐度等,眼見4,5間房係咁叫名,但叫極未輪到?冇耐見房有個醫生出咗去,跟住回來,Michelle姑娘就叫住醫生,指著我話縫好針好耐,幫佢睇睇,等佢可以走.唉!真係無得頂,醫生揭起一半,話幾好吖,得啦,Michelle姑娘就同我換過塊膠布,佢揭時怕我腳毛痛喎,真係好窩心,我一手就搣走佢,貼過塊膠布,交帶幾句走得.

真係好多謝喱位Michelle姑娘,竟然完成佢工作,還記得我,好嘢,衷心感謝.

1855離開威院,搭程小巴返回商場,老婆call齊人食大家樂,各自用優惠券食飯.

飯後返歸以經2100,我都嗱嗱淋沖涼,傷口問題,佢又話咁,佢又咁,唉!攞個膠袋,開個0隆,橡筋上下箍住搞掂,我條血跡斑斑褲.

沖完涼嗱淋趕我今日編blog,收筆0136.