5月27日(一)一覺天光,生日歌,黃雨B無上課,老婆沙角買魚禮品,茶麥記,煲劇山河令,晚老火清補涼,兩人食.

2024/05/27   星期一   雨   29C

昨晚差不多成一點瞓,竟然一覺今晨0615醒,又唔太急下去個所?簡直少可,竟然一覺可瞓天光?唯一可惜夜瞓晨早醒.

醒咗昨晚條生日片,硬係唔多滿意?就等我來換過首生日歌?youtube一找?竟然找到佢生日祝福歌,巧巧聽,嗱淋下載,再一搞0825,就完成條生日片,完成後賴多陣0915才起床.

如常烚水搞早餐,0945老婆又話過沙角買魚喎?新抱B又陸續蒲頭,新抱話今早黃雨?所以個B無返學?1016早餐.

餐後1052老婆已經返到,沙角街市買有魚85蚊,雪蝦仁98蚊,菜21蚊同蘋果20蚊,樓下街市豬展70蚊,又沙角街市積分換咗三樣禮品喎,有套陶瓷刀,保鮮紙同濕紙巾.

餐後深深不忿,昨晚我話榴槤唔太靚,個仔個女就話我以前買啲仲差,谷Q氣,記憶所及?N年都無買過榴槤,何來差呢? 耿耿於懷,餐後要事都唔辦?摷回紀錄同老婆呻吓,燒燒我啲谷氣.

2019年叫做食過兩個,成124蚊個,2018年8月嗰個就66.6蚊?鬼咁靚,現在要個座底百多元個,係價值問題?我喜歡原個買唔劏開,萬一買回來唔靚,揼完心口揼背脊.所以喱幾年邊捨得食吖?要食大大個我一個人都食晒.

同老婆呻完又一個上午,成一點鐘才去床攤唞瞌吓.

3點鐘母女出街,我同老婆成3點幾才下午茶,大家樂都費事入,直頭麥當奴,食個魚柳包餐20蚊,吃後9蚊整美祿雪糕兩份食.

吃過吹輪水才走,街市買菜買有蒜頭薑15蚊,菜20蚊返歸.

回家1655,老婆又話忘記倒廚餘,於是再落街再去倒.

到回來同埋個B返,話遇著新抱,新抱買餸喎,老婆又買50帶子返?

回來個仔已返咗來,正在準備行裝旅行?稍後我都早點沖涼,涼後我都攤床寫寫blog,

醒起今早摷生日歌,見同龔俊有關,但又摷不到有關料,但醒起龔俊有套劇山河令,以前睇過好好睇,又摷吓佢?咦!youtube36集有齊啵?難得有齊,不如重睇都好.

就係咁一睇1914,老婆來叫開餐,有老火清補涼,粉絲蒸帶子,炒菜芯,我又唔知點解咁飽?飲湯碗湯算.