昨晚11點多以經瞓,4點多去個所,就瞓到今早7點鐘,笠隻耳筒賴床到8點起來,相當好瞓,起來以經急不及待要開大,非常暢順,見暢順上磅一磅140,還好無重到.
洗個面食埋個早餐才9點20分,上輪網無所事事,唔好襰,的起心肝,郁手做啲嘢,床尾層板想做多時,攤開架生,摷開堆爛板,廢板重做,一做12點多鐘,叫做搞掂.
跟住廚房鑽吼加加改改啲掛鈎,個仔放假才瞓醒,叫做幫吓手遞吓架生,做做吓電話響,原來以經3點鐘老婆放工,邊度都唔去,就樓下食大乜樂.
三仔乸每人食個下午茶餐,合共74蚊,餐後行惠乜,買有廁紙兩條49.8蚊,粟米油5升送0.5升107.9蚊,旺旺20蚊,即食麵兩包28.8蚊,個仔汽車香貼兩塊30.9蚊,跟住商場麵包4片4.5蚊,街市芥蘭5蚊,布包豆腐兩舊8蚊,合共254.9元返歸.
回家執好架生,老婆善後清潔,我就上油,搞掂又5點多鐘.
夜點煮飯料有,雞肉粒,豆腐8蚊,芥蘭5蚊,南瓜約1蚊,彩椒約3蚊,胶筍2.5蚊.
雞肉粒麵豉煮南瓜.
胶筍彩椒炒雞粒.
椒鹽豆腐
灼淥芥蘭
4個人食一夜返留餸,今餐唔計雞肉粒,盛惠19.5蚊
金寶叔,椒鹽豆腐整得好正,教吓我典整,作分享謝！
回覆刪除都係咁炸啫,泡打粉,麵粉,雞蛋,調味整個漿,豆腐要乾身,浸漿炸,之後落椒鹽兜兩兜上碟.
刪除吓！你個仔12点幾先起床，呢個時間我食午飯啦，証明你個子年青，我呢輩天光就醒，边瞓得咁晏。
回覆刪除椒鹽豆腐要炸嗎？我怕多油，用易潔鑊做到嗎？
日日夜瞓,積積埋埋放假瞓夠本,話極唔聽,唉,咁大個人都唔鬼理佢.
刪除豆腐要炸,用普通鑊咋,我唔用易潔鑊,喜歡傳統嘢多.
應該得嘅,炸火力猛,塗層嘢無咁好囉.
我每日都瞓到11,12點幾先起床播! 哈! 好彩金寶叔唔係我老爸, 否則實激c 佢呢! :p
刪除哈!點同吖?佢日日要番工,要7點鐘出門,晚晚無1點都兩點至瞓,積埋放假嗰日瞓餐C,唉!我就睇佢唔到,將來佢就知.
刪除椒鹽豆腐整到好似街外食一樣靚， 點先可以整到豆腐乾身呀？
回覆刪除哈!你咪玩我啦,你中西都咁叻來問我?我都係一般咁,廚房紙索乾咋.莫非你有更好辦法?
刪除