瞓得好,雨落不停,心臟科覆診,救命藥木耳,老友輕微中風住院,晚飯4人食.

昨晚12點前都瞓,一覺今7點鐘醒,睡來唔錯,賴至8點鐘起來,無乜唔妥,洗個面早餐便上網,量個血壓食埋藥開埋個大又9點15分,上陣網9點半鐘個市又開,美股昨升304點帶動,恆指高開314點,我亦係時間過李家誠心臟科覆診.
唉!雨落不停,而且好大,成世人出街都唔帶遮的我,迫住摷把遮出街,過到火車站鞋都濕晒,第一城下車,孭著個袋担著把遮,過埋個神奇十字燈位,馬路不平水氹多,都係匿響人群後,行過長長威院走廊,9點55分來到登記處,人龍長過鬼,都係百達通方便啲,扣過60元卦號費,便南翼一樓看醫生.
交過覆診紙便坐埋一邊等叫名,由於一條氣來到,都係坐陣才量血壓,誰知坐下未夠10分鐘,已經叫名,3號房門口等見醫生,還未量血壓,護士叫量咗先啦,唉!誰知一量,上壓竟然150,真失望.

門口等咗陣護士叫名入房,是個年輕男醫生,都係嗰幾句,有無唔舒服,心口有無痛,跟話我血壓高咗啲喎,我話都唔明?來襯量都係高?響屋企無咁高,於是比今朝影落,今個月血壓表過佢看,看過後,說不太高,不如同你加重些血壓藥,我話好.
 
 跟住我話自從証實水喉銲接位有鉛毒,咁啱我屋企水喉正是銲接,不過到食咗廿多年,可唔可以幫我驗吓有無鉛毒,佢話喱啲要房置驗過水有鉛,才同得你驗,而且喱度都無得驗,都明白理解既,都唔關個病事,跟住講埋我手起啲硬粒,佢話對手好乾喎,比啲藥膏你搽.
差點忘記驗血報告,佢才電腦睇吓,說無事,我問究竟係驗乜?佢話血脂同乜乜?都忘記佢講乜?總知無事?由於上次比咗好多無謂藥,今次再要小心對番,於是拿我食開藥盒來對,一共6款,加埋潤手藥共7隻,拿過藥單,覆診紙同抽血單走得.
離開醫生房才10點25分,便地下交藥費,半年藥7隻共140元,交過藥單攞過排隊飛仔288號,便返回登記處邊抽血部預約.
預約後返回南翼藥房等攞藥,現時做緊200號,還差88個,在等其間,陳成whatsapp過來,話找不到老馬,我話佢要1點打後佢才瞓醒,兼夾問吓佢,有無興趣探吓萬昌,到時約埋老馬一齊去,回覆話OK.
一等11點15分輪到,拿好藥便穿過威爾斯長廊,出到巴士站,才醒起可以搭綠巴,等咗陣以經有車.
 回家以經12點鐘,唉!對膝頭痛到乜咁,覆診條路係長啲?可能落雨天行得急卦?返歸望吓個市?唓..得升嗰15點,跟住高清台睇楚漢.
藥就無錯,剩係血壓藥加碼,由半粒改食一粒.
 
潤手膏一模一樣,舊嗰樽以經07年皮膚科既事.
 
看完集楚漢至電過老馬,打了好幾次還是無人接,大概去咗旅行卦?至電過陳成話佢知找不到呀,可能不在香港卦?
收線後開工,搞我救命藥,昨晚浸下的木耳,黑豆,黑芝麻,紅棗,加幾片薑,剁碎木耳壓力煲來啤佢.
 
3點多啲鐘老婆放工來電,落雨天邊度都唔駛去,就樓下食大乜樂啦.
木耳熄火後落大乜樂,同老婆每人食個下午茶餐,坐陣就街市買餸,街市買兩隻節瓜5.5蚊返歸.

離開街市又傾盆大雨,返歸又搞我啲救命木耳,倒佢出來攪拌機打成糊,攤凍入雪柜慢慢食.

 

夜7點多鐘正想煮飯,電話響,今日打極無人接既老馬來電,原來係老馬個仔呀麟,說佢老豆輕微中風入咗院,情況不嚴重,只不過說話有點不清,說現在不能探佢住,等他搬出普通房才告訴我,唉!人老咗不是嗰樣便那樣,好啦,希望快啲好番,記得探得比電話我.
知後通知陳成,唉!陳成堅持要去醫院探佢,重話去到醫院一定查到響邊度,唉!人家個仔咁講?一定有佢原因?你唔信可以至電老馬或佢個呀麟,佢話呀麟唔接電話喎,唉!我唔知你哋.

收線後煮飯,菜料有白蘿蔔1條5蚊,牛仔骨,粉絲1包,節瓜兩條5.5蚊,蝦米,瑤柱同火腿,雞蛋4隻4蚊.

 

牛仔骨炆蘿蔔.

蝦米節瓜粉絲煲

瑤柱蒸水蛋.

4個人食一夜返留餸.