睡來普通,老婆放假,老婆補褲我煲劇,深水埗食粥,鴨寮街買燈仔,賭馬輸60,晚飯5人食.

昨晚同新抱傾兩句,11點幾上床,煲陣秦始皇劇就瞓,劇制作同羋月傳差得遠,叫做睇吓故事都唔計較,一覺瞓到今晨6點鐘已經醒,瞓不返手機賴床,7點多鐘個女閙鐘響不停,我笠住耳筒睬你都儍,老婆放假亦瞓醒,老婆極之唔耐煩,要起來拍個女,唉!女就係咁話之你,所以話老母等如老女傭,直至個衰返了工,我起來以已經8點多鐘,處理一吓曬晾衫便洗面弄早餐,拍醒老婆洗面,才餐前量血壓137/80-50,

吃過早餐食過藥又9點半鐘,上網寫下今早便辦大事.
辦埋個不肖事又10點05分,本來想話去行山,諗住近近哋去梅子林,但老婆又話同個仔補褲,衣車盞燈早前燒咗,又見幾日腳痛剛好,都係唔去,都係晏啲出鴨寮街睇吓,買番盞燈仔啱衣車用好過.
老婆補褲我又上網煲劇秦始皇,煲陣就刨馬仔,1點多鐘老婆補妥啲褲,馬亦跑完第二場,咁就賭番幾場馬仔,就第7場同第9場,單Q各10元,另外PQ二串三30元,合共50元算,投注後出街.
搭程車出深水涉,選擇搭多個站營盤街下車,食傳統粥,老婆魚腩粥24蚊,我碎牛粥14蚊,炸麵6蚊,蘿蔔糕10蚊,合共54蚊
 
吃後坐陣無聊睇吓啲馬仔,手痕第五場又賭10蚊,結果係輸埋,離開粥鋪過鴨寮街,星期日特別人多,行吓睇吓,睇啱又四圍昅吓價,足知20蚊買下粒usb白光燈仔,單車補呔貼25蚊,買完以經4點多啲鐘,係時候要走,回程兩蚊店有洗衣機垃圾6蚊,拉尺仔3蚊走人.

 回家樓下街市餸,買有節瓜5.5蚊,四季豆7蚊,蕃茄6.5蚊返歸.
 
回家5點半鐘,今日投注的馬全部輸晒,尾場還未跑,已經輸夠,都係唔賭睇跑馬,結果大熱門收場.
睇完場馬,搞吓盞usb燈仔,又ok啵. 

試過燈仔上網我今日blog.
7點45分煮飯,料有節瓜,四季豆,鹹豬肉,芝士,鹹蛋同蕃茄.

 鹹蛋節瓜
 
芝士蕃茄,

鹹肉炒四季豆,

8點35分開飯,5個人食1夜返留飯餸.