睡來唔錯,大市回穏,無嘢好睇,游水800m,大圍拮嘢,麥記唞唞,晚飯三人食.

昨晚12點前都瞓,一覺今晨6點鐘醒一醒,老婆返工,去個所後又瞓返,瞓到8點多啲鐘醒,睡來相當唔錯,一切良好,洗個面上網稍後早餐,辦妥一切事務,上陣網又9點半鐘,神的晚餐.

看完集劇後,望吓個市,大市見回穏,看來都乜好睇,看吓電視上吓網又一個上午.

都好多日無游水,看埋午間新聞就前去游水,過到泳池搞掂一切,上池陽光勁猛,稍熱身2兩點鐘下水,泳客唔多好鬆容,一口氣游佢500m,池邊稍唞,再來300m夠數起錨,更衣室掂一切,剛好3點鐘,老婆放工來電,又話大圍食拮嘢喎.

過到大圍拮野,老婆已經在等,每人食個飯餐,佢20我19蚊,餐後行街市,買吓行吓見麥記有位,兩公婆又入去唞唞,每人食杯軟雪糕7蚊,歇陣又起程返歸.

天氣實在太熱,同老婆又靠學校邊行,城河邊樹蔭櫈又坐吓,偈夠唞夠繼續回家,返回自己街市,又貢上惠康,實在太熱,我要買汽水,20.9蚊買三支1.25升玉泉,溝鮮奶呀,街市老婆買薏米同冬瓜返歸.

今日買料有玉泉3支20.9蚊,方包9蚊,薏米5蚊,冬瓜7蚊,鹹蛋5隻10蚊,司華力腸12蚊,三文魚腩12蚊,烏冬11蚊.

 

回家老婆搞煲湯,今晚料有食不完白豆,司華力腸一條2.4蚊,三文魚腩食半6蚊,

 

香煎三文魚腩

 司華力腸炒白豆

牛榜薏米赤小豆煲冬瓜

 三個人食.