成晚嘈嘈閉,鼻感又發作,煲大陸劇,游水700m,大乜樂下午茶,晚邊爐後遺症,5個人食.

昨晚好唔想寫埋編卜,結果出埋又成1點鐘至瞓,瞓至半夜,似乎唔多夠暖,咁啱個女埋嚟,問夠唔夠暖呀,意識上搖搖頭,佢就摩摩我隻腳,就呱呱嘈,好凍啵,嗱淋嘈醒個老母,揾被過我冚,唉!臨急臨屁冚?老婆瞓得好好哋,梗係又呱呱嘈,結果個女摷咗件羽絨出來.

又瞓到夜啲,鼻敏感發作,鼻塞得好唔舒服,為有趌起身,枕頭墊住條腰,挨住坐來瞓,瞓瞓吓,重心落在屁股,輪到屁股痛,為有又服原狀,便瞓到今早8點幾鐘醒.
起來邊早餐邊上網,開埋個大事又差不多11點鐘,上輪網煲劇,早前留言區介紹套劇,叫四十九祭,昨日睇咗集,真係唔錯,印象好似亞視播過,唉!亞視播有鬼人睇咩?
睇完第二集又一個上午,1點多鐘還是去游水,執齊游水嘢,去到攞單車處,好彩再check吓個袋,原來無帶泳褲,又返回屋企攞,唉!揾極都唔見有,為有拿條後備褲,出咗門有點不甘心,望吓自己個曬晾間,掉..鬼喑眼,又返回去攞過.
搞兩搞去到池兩點鐘有多,嗱淋換衫上池,稍熱身兩點20分下水,3點鐘老婆放工,時間無多,於是一口氣游佢700m,兩點50分起水走人.
更衣室搞掂一切,以經3點有多,老婆來過電,覆佢不用大圍買餸,樓下食大家樂算,又永森來過電,叫明天踩單車喎,好,橫掂明天洗池無水游.
返回商場大家樂,老婆以經在等,跟住個女亦到,每人食個下午茶餐,餐聊兩句,個女吓吓窒住個老母,我講笑人老咗bb一樣,乜都唔識,同個女研究吓apps,老婆可能太累,托住個鰓恰眼瞓,我同個女又整鬼佢,拍下佢個烏眉恰睡樣.
茶後街市買兩條茄子4.8蚊,一磚豆腐4.5蚊返歸,回家繼續煲劇,夜點煮飯,半數昨晚火鍋後遺料,有豆腐,南瓜,生菜,茄子同魷魚.

 煎釀茄子.

煎釀豆腐

 魷魚蒸南瓜

生菜包

 5個人食1夜返留飯餸.

飯後果安琪梨