新年快樂
2022年12月31日 星期六
2022事無大小回顧
2022大小事回顧
2月1日大年初一,年年今日都會去同大佬拜年,疫情下今年,同樣又在家視像一番.
3月7日新抱中招,早覺早隔離,一人在房渡過10天康復,全屋人奇蹟無一感染.
4月29日單車場見兩部人棄單車,於是乎益人不如益己,原來多兩部多兩個煩惱,看牛咁看?結果8月14日一部被人偷走,損失我一把yale靚鎝,另部送過過給華仔。舒服晒.
5月16日三歲零個B,佢娘教導下,快測自己撩鼻.讚.
5月27日關愛基金牙醫,漁翁散網下,得以博康邨,博安樓基督長者中心協助,6月15日在乙明聯合牙醫,經過漫長6次見牙醫,9月28日成功完成我上下棚假牙。多謝政府關愛基金。
6月10日房署換馬桶,由於我家馬桶改動過,無咗條臭氣,疫情關係要我們加番條臭氣,無奈交回房署搞,馬桶換新。收我1980元.
8月3日長者健康中心會員,老婆終於輪到,沙田診所身體檢查,一驗下超高血壓,嚴重即時入威院.留院兩日8月6日出院.回來日後竟然血壓正常,無需食藥.簡直奇蹟。
老婆出院後,決定跟隨個女斷食減肥,直至22年尾成功減去30磅。
8月12日老婆北區醫院檢查,順道彩園邨探大佬,疫情下兩年多無見,寒喧一番,滋味在心頭。
8月16日心臟覆診,又要抽血,無打疫苗,多重關卡下,成功覆診.
又破傷風針第三針,即最後一針未打,都諗住放棄,見瀝源診所在此,麻煩些排隊打埋,完美解決。
8月19日老婆樂悠咭輪到,旨意後生幫手?還是我這老伴攪掂.成功伸請樂悠咭.
2017年5月7日,3578元買的Acer Axe-780電腦,今日宣布打柴,經個女鍥而不捨拆走個hard disk,電腦送過比環保呀姐拿走,自此就無電腦生活。
9月1日病風寒,醫療車中醫,三劑藥康復。
9月27日N年氣喘病重臨,無奈類固醇藥用晒,藥房120元買支頂擋.
12月3日新dretec血壓計到,2010年5月2日以538元買的歐姆龍血壓計,經歷12年退役。
12月4日信用咭一年一度搞免年費,日間財務攪掂.了件事。
12月15日第6次睇醫療車中醫,15劑補身中藥,剛好今年醫療券用光,完美解決。
12月24日新冠終於輪到,中招兼夾氣喘,類固醇多口無效,無奈999入院,急症室苦等整晚,翌日10點鐘才上病房,12A房9號床,翌日旨意老婆供應日用品?誰知老婆亦告中招,跟住一家淪陷中招。
好彩大小病徵輕微,而我留院五天,經歷前所未見?人間煉獄,睇化人生薄弱,僥幸逃出新冠,醫好我氣喘。
多謝威院上下醫護,衷心感激。
29號出院回家,齊齊閉關渡過2022年。
閉關 (二)整日在家.
2022/12/31 星期六 晴 25C
昨晚乜都無做,早早10點鐘瞓,瞓到4點幾鐘醒去所,回來瞓不返,收音機捱,歌仔捱,最後平板錦衣之下捱.
0850起來,氣溫15?面未洗嗱淋做個快測,0910條紅線淡咗,依然要閉關,跟手噴埋兩隻噴霧,才洗面擦牙烚水搞早餐,0938開餐,餐後食埋我幾粒心臟藥,咁就完成今早事.
1054告別血壓計,歐姆龍2010/02/05,已538元買入,22年今日宣佈退役.
1350老婆斷食開餐,
老婆開餐又輪到我埋位,雪柜料有乜煮乜,1436搞掂食得,自從返來後,唔知點解特別肚餓?成煲食晒舐舐嘴?
1600防疫物資又到,困獸鬥又有排食.
2025新抱煮,4個人食.
防疫包.
1906老婆斷食開餐.
2022年12月30日 星期五
閉關(一)整日在家.
2022/12/30 星期五 晴 15C
餐畢又輪到下家,三口子蒲頭,個B好乖叫早餐,剛好亦早餐.
昨晚11點零已經上床備瞓,同老婆傾兩句就傾不停,成12點幾老婆鵝才瞓,一覺5點鐘醒,還以為還在醫院,老婆在夜機,無瞓過喎?
去個所後攤響床,無聊又執吓啲日記,醫院期間太多太亂,手機又難寫難記,得閒才執啲,執到手痛眼又矇,煲劇錦衣之下12,真係好睇,演好,劇又好,最好重係粵語配音.
一煲0845起床,病後瞓咁少又OK啵,又一天開始,兩公婆各自動手,各自揾食,樽木耳發到爆樽,可見澎漲得幾犀利.
輪住早餐咁又一個上午,衰豬無聊就玩化妝.
無驚無又要祭五臟,1335老婆先行,個仔三口跟住,我就押後,簡簡單單煎隻蛋淥個麵.
響企唔係煲劇就電視,唔係就行行企企,揾嘢搞又密質質,1905斷食老婆開餐.
夜新抱煲咗蘋果魚腥草湯,叫唔好煮,是但啦,2034開飯4個人食,個仔沖涼留湯飯餸.
2022年12月29日 星期四
(威院五日) 出院.
2022/12/28 星期四 晴
餐後見呀姐正同12床91歲呀伯換片,好奇問句點解一個呀姐換片?唔係兩個打對面咩?呀姐話得我一個番咋,全部病晒喎,跟住提起昨晚11床嗰件嘢,佢話一共走咗四件喎,唔夠人做C人喎?跟住12床呀伯又話要換衫,呀姐話你叫下更啦,下更有兩個呀姐,我即時叫住呀伯忍吓先,等佢通知下更,有得換嘛換囉,無嘛忍吓,非常時期呀.
午飯本應1130以經有,今日無人手,遲咗到,見到三個飯到咗,但無人拿入來?睇到食不到.
回來後搞掂一切,兩公婆縮埋間房,老婆執嘢我就淥個麵食,麵後寫吓blog.
昨晚10點半瞓,一瞓0230醒,所後又瞓不返,冇耐電視熄埋,呀姐就陸續來拉晒簾,唔通急救?一於少理聽住歌仔瞓,但見啲人經過後,就拉拉條簾,行過又拉?心諗不尋常?突然聽見好長拉錬聲?
0345布隙裝吓,見斜對面11床有小部黑色膠袋,唔駛問呀貴?繼續閉目聽歌仔,0400聽見推件嘢經過出門,我就同佢祈禱,一路好走,跟住冇耐護士拉開晒啲布簾,一片光明.
瞓唔著,歌仔,收音,手機下捱天光,捱至7點鐘見兩個呀姐,一個担梯取11床拆換簾布,一個搞清潔,而大隻仔男護士來派藥,我就起來吐下我第一痰,感覺開始喉沙?跟住大隻仔護士叫食藥,叫噴藥,我話我口罩兩日啦,可否攞個過我?佢話得,我話要個N90?佢話無呀,我都係最後一個咋?呃鬼咩,咁就比夠兩個我啦.
到食藥,早餐未到空肚食藥?唔理啦,食粒胃藥才食其他藥,好彩碗麥皮及時到,嗱淋灌兩杯水食麥皮,吃後一兜藥倒晒落肚,然後續支噴劑噴,4,4,2噴晒佢,然後梳洗搞掂.
無聊寫吓blog啦,0818照X光到,原來照我,唉!希望照完OK出院喇.
照後去開鋪大,開大期間0833,有把女人聲叫9號床去咗邊呀?我話廁所呀,揾我做乜呀?佢話我係醫生呀,跟住12號91歲呀伯幫手嗌醫生呀,我就嗱淋搞掂出去,擒擒青口罩都跌埋落個塔?好彩兩隻跌一隻.
嗱淋出去,還好女醫生一路睇緊其他,我就較好張床心平氣和等醫生.
睇到對面12床91歲呀伯,醫生話佢條氣還未得,飬氣唔甩得?要繼續聞住先喎.
跟住輪到我,聽筒聽過話OK,出院好嗎?還差一樽藥水要吊,吊埋可以走喎?連忙感激萬分,多謝辛苦晒.
無聊又打過老婆睇吓佢情況,傾完見到動態大佬留言,於是順意打比佢,原來佢都入咗醫院,北區醫院,在院內中新冠喎?現在好得多喎,大家都告個平安收線.
百無聊賴等最後樽藥水,等到11點多啲鐘,大隻仔護士到,幫我吊最後一樽藥水,搞掂等藥水落.
1250有位傾得兩句呀姐,入來清潔,托佢幫手拿入來,同12床91歲呀伯同我才有得食,今早一碗麥皮頂到家陣.
兩條友狼吞虎嚥,藥水就落晒,等護士拔走,硬係無入來?我就同清潔呀姐講,如見到有關護士幫我提提佢,尿急呀,呀姐幾醒一睇?佢立即幫我拔走佢.
去到1331呀姐又來清潔兼換片,我又叫呀姐若見到護士,提提佢我粒豆仔未拔,無得頂跟住大隻護士來,幫我除埋粒豆仔,搞掂後叫換定衫執好嘢準備走喎.
執好後同91歲呀伯吹水,大講道理,又同呀伯合張照,吹輪水1415
見兩趟門出便有姑娘揮手,問係咪我出院,係呀,就叫我執齊嘢出去,我就同幾個院友道別,祝好運,有緣出便見.
離開出第一度趟門,已安排有輪椅,再出埋第二度,個姑娘比袋藥同出院文件我,話以安排抗疫的士,輪椅送到我到的士站喎,咁就輪椅一路行,我每見工作人員,就揮手講多謝,多謝充心多謝.
推輪椅呀叔,對啱車牌,我才上車,多謝呀叔後,車就回家進發,攬住袋衫攬住袋藥,才發覺手鈪未剪?扯又唔甩?為有用毛巾扎住落車返歸.
回家1450,老婆幫我剪彩,然後沖個大熱水沖,一洗我五天之苦不堪言.
到夜個仔三口子話買外賣食西嘢,老婆就煮佢斷食餐,我諗吓都係煮,於是就兵分三路,各有各煮.
1932老婆開餐,我才開工煮,雪柜料有雞蛋,牛肉,臘腸同菠菜苗,樣樣啲,一煲搞掂.
2022年12月28日 星期三
(威院四日)
2022/12/28 星期三 晴
昨晚12點鐘瞓著,瞓至4點鐘,被嘈雜聲嘈醒,個個爭住叫姑娘,救我救我,原來夜香隊到,換片搞清潔,矇矇醒見到,如似戰場一樣士兵在巡,我哋瞓在地上一樣,嗰啲友猛叫佢做乜做勿,清潔嗰啲猛叫,我對手有屎唔得住呀,我冚著被都唔敢郁,尿急唔敢去,一來阻住人工作,二來又臭又肉酸.去到5點鐘我才起來疴篤尿,咁就收音機塞耳到天光.
0720派早餐到才起床,起來先行吸兩口類固醇自行去梳洗,搞掂0750早餐到,通粉同個包,跟住姑娘到,放下兜藥叫食同吸噴氣.跟住我問可否撩鼻,原來早以安排,可惜還是兩條線.出關無望.
2023/01/01 0500 失眠諗起😴
最後一面,家人安慰.
0958返回床時,見有個護士拿住手機孭住背囊,企響兩隔離門中間隔離區,係咁視像講電話,手機就向住11床,我還以為佢收工?原來大概幫親友替家人視像見面?我矇查查,還用手勢示意佢收工,早點返歸休息啦?
當期時11號床呀伯,好平靜好安詳瞓響度.
當晚12月29日 就安然離世.🙏
之後同老婆視像吹水,聽聲線老婆都好好多,而孫女都係輕微燒吓同無燒咁喎?新抱就無中招可能有抗體啩.
1128中午飯到,照板照碗塗滾水盡食光佢.
飯後特別寧靜,可能啲病友,半夜嗌救命,嗌到攰日間瞓晒覺?閒來同兩個呀伯吹吓水,一個加床81歲同對面12床91歲呀伯吹水,原來一個乙明,一個新田圍,講吓啲開心同傷心故事,吹輪水youtube煲劇,錦衣之下.
1509男護士到,還以為要吊針?原來量血壓同打針,一大筒針葯水注入豆仔,鬼咁拿?跟住教我如何用噴霧器皿,吸嗰三支噴劑,最後問佢大約幾時出院,話喱一兩日喎?又一次失望,連除至電個老婆心理準備.
繼續煲劇到1759晚飯到,依樣葫蘆,滾水撈食,
食咗半見大隻男護到,似乎有料到,原來推走成日嗌救命10號床,我就話今有覺好瞓,個女幫護話你就想,等陣有個新症上,可能重惡梗,我話又可能女病人呢?呀姐話你就想?有都6,70呀婆啦?我話我都呀公啦,就咁左推右避下終於推走個10床,我重祝佢好運.
唉!推走後以為佢就推新症入啦,剛好食完個水飯6點新聞,李家超放寬疫情制度,於是行近去聽同睇啦,全神貫注去聽,嗰條成日要幫加床條友,因為佢張枱推咗去廁所嗰邊,佢叫我同佢攞眼鏡又話攞碗粥,谷Q氣話九佢,我響度睇緊新聞,你都要留意吓人家,比啲耐性至得架,我攞咗比你食,萬一新症到,你就開緊餐就阻住人做嘢,我同你攞,你簡直陷我不義,跟住大數七佢自私,只顧自己難,唔識去睇其他人難,全部老嘢都係自私鬼.
個大隻男護又係?無手尾,無咁快到就單聲,推番佢張枱返來嗎?省佢一輪,下次睬你都儍.
繼續煲劇到2003藥到,兩粒基本心臟藥,一粒盬丸,三支噴劑要用支大砲來吸喎?
搞掂個女來電,問點解未出院?我點知呀?係一兩日啩?收線唔好阻住我煲劇.
2115新症到,原來中間插入來,一排過三張床,迫到我埋墻邊,新症床病人拍窗邊,被我省個要求王夾中間,黐住我隔鄰,又唔戴口罩,又要多多要求,唔該駛C人,話之你拉布簾煲劇,到2230瞓覺.
2022年12月27日 星期二
威院(第三日)
2022/12/27 星期二
昨晚0044,個96歲呀伯被轉去我後便間房,瞓正床後,冇耐又來個新病人,姑娘又到成點鐘才完成離開.
姑娘臨走,一眼稍到我無聞飬氣?我才醒起廁所回忘記聞番?好彩佢係幫手呀姐,若果係護士,肯定不準我再落床.
無瞓過,係5點多鐘瞌咗陣,0654醒,又11號床響度嘈,係咁叫姑娘,嘈到10號幫手嘈,又拎埋隻大象腳來敲枱,又嗌救命,都知喱班老嘢,都係吹無求疵,都知成7點幾鐘都無入來,又叫幫佢撳鐘?
等咗好耐都無人到,我又唔敢落床,怕姑娘撞正,鬼渣咁嘈.
0738姑娘蒲頭派藥,清潔呀姐亦到,兩條病人又要求乜要求勿?姑娘又好嘢啵,係咁講用大話來敷衍,唉!又邊有咁多人手吖?姑娘派咗藥後我食咗,
入到廁所,擦擦我兩日無擦既牙,係咁易祙吓個身,疴篤大尿嗱淋都走.
出來以為視像個老婆啦,又話唔得閒?掛住啲衫喎?為有上住youtube先.
到0904,老婆視像到,佢話我無睇what's 咩?
原來老婆又中埋?咁就大鑊,旨意你幫我帶物資同個平板過來?好寫吓嘢啦,手機寫QC我,𠲖架大鑊齊齊過堂.
我就連除打比個新抱,問佢快測有無,奶奶中咗呀,旨意你啦.
收線後大約9點半鐘,個女醫生入來,15分鐘不用?便睇晒5個病症,佢問嗰樣要答嗰樣,無得補充,5個病人又無用筆紀錄,就咁離開,我唔識講?
1206開餐,
由於拿手機隻左手,用到積累右背後邊肌肉勁痛,夾硬出埋兩條個B生日短片,1929頂不住,要平攤響度聽歌攤唞瞓,誰知衰女打來諗住平心講幾句,結果2030都係要關佢機收場.
收場後攤唞佢一輪,11點鐘起來坐陣才起床,碰啱呀姐入房做嘢,呀姐好好心,驚我企唔穩?扶我一把到廁所門口,多謝晒.
在廁所擦輪牙,來個全身揮祙勻,舒服晒1145安心去瞓.
2022年12月26日 星期一
(威院二日)嚴重咗,嘈醒手機天光,落床開大,放棄午飯,
2022/12/26 星期一 晴
昨晚趕埋編blog,11點零瞓,瞓到0435,突然被句好大聲說話驚醒,就係你落床做乜嘢?原來斜對面11床老人家想落床,結果老人家經一叫,無落到床,響床係咁吟吟噚噚話,想飲水,想飲水,我就大聲幫口回應個咪,佢想飲水喎?
這刻我亦成身汗,也想落床去個所?差點忘記自己一樣,唔可以落地?其實瞓前我亦落過地執過手機,就無大聲公喝住?可能睇我唔到?
被佢嘈醒咗?我就寫下blog,結果一寫天光.
件羽絨太大件阻Q住晒?條門匙亦要收好,年老無記性,記遠忘新,到時要揾就大鑊?於是乎門匙放入羽絨袋,一起卷成球形收起.
還未摺妥件羽絨,0730就燈光通明,護士,清潔工進場,護士一個,派藥,量體温同量血壓.
量血壓紮得我臂太緊,成隻手缺晒血,血管充到蚯蚓一樣,鬼爪一樣,好恐佈,話聲護士知?佢話就完量喎?量完問聲,佢話無發燒,血壓正常喎.
清潔啲呀姐就派餐同搞清潔,早餐一碗麥皮同小包餅干食晒,零願食佢好過兩餐正餐.無得沖涼,無得洗面同擦牙.
1030姑娘入嚟,問我你自己行唔行到去廁所呀,嘩!喜出望外,嗱淋話得,得,得,嘩!入院以來無去過,疴尿都要用尿壼,週身唔聚財,起來差點唔識行?要慢慢適應,而對面12床病人聽見有得去廁所,佢又話要去?呀姐知道佢條件,叫佢用兜,結果大不成.
1710才到,同我除咗條喉,針就未得閒換喎.
1730晚飯以經到咗,掛住寫blog去到1800,見環境好些?嗱淋用滾水送食,食咗一半都無,算數,肚餓還有個麵包.
我就好小心下完成件要事,舒服晒,1100老婆手機視像來,傾輪家事大件事,期間1130午飯到,另外姑娘又送鹽餅丸一粒過來,問佢點解要食佢,佢話我小鹽血壓低喎,諗落平時確係小鹽小糖?跟住問句,我情況可否調遷去無咁嚴重病房,佢話會要等排隊,排緊隊喎,問佢我喱個病通常要多小天才出院,佢話都要好多天,而在視像電話老婆都聽到晒,見有排未返得歸,叫老婆明天帶個平板來,同些乾糧來.
起初諗住咁精神入來,只不過中招同氣促,新抱講得⁶無錯中招初期,頭兩天係無乜病徵,第二三日後才嚴重,今日第二日開始心口痛,幾聲咳同氣促,見有排未出院叫老婆下次攞埋個平板過來,寫字都大隻啲,螢幕都大啲.
收線後食埋粒鹽丸,以為開餐爬幾粒,見姑娘餵餐過加床位痙攣病人,病人又嘔又吐,噴到姑娘一身都係,見姑娘奪開門出去換過件抱,又我對面個12床係咁咳痰,痰聲㗾㗾聲嚇C人,紙巾接不住,一身都係,結果姑娘要同佢哋抽痰,一抽就三個病人,
見到一切,本來餐飯爬幾粒頂吓檔,唔想食更加唔敢食.
1700睇見1414政府發出訊息,叫伸報中招,但24號當日試填過,但搞極唔掂,現在又試搞吓,但都係唔成功,於是whatsapp過女同新抱.
跟住新抱來電,說一定要當時人電話才填得喎?叫唔好理佢,話大把人都唔識填喎.
傾話期間,護士入來比咗啲新藥我,又話要吊樽藥水,同昨日樽一樣,我掛住傾都無理住,
傾完電話1646正想去開個大,差點忘記還吊著針,發覺藥水滴完,針口倒流血,於是撳鐘叫姑娘.
解決後同護士講我想去開大?佢話唔得,你聞緊飬氣唔行得開,我今早姑娘都比我去啵?佢話等我佢駁長比你去,見咁麻煩佢哋又忙,我唔去都可以,算罷啦唔去,佢又話唔好,後來攞兩條喉駁長,我話我來駁你做其他啦,到時我同你收好放柜面,1722搞掂鋪大.
6點半鐘個痙攣病人被搬走,整間房鬆動晒同靜晒.
1930晚間原有心臟藥到,類固醇早晚各兩口,新加粒白色藥.
2115有新病人到,又有個老人家到,兩個跟床姑娘忙起來,還未搞掂,12床一見有姑娘到,又叫起來,猛話粒豆出血喎,姑娘係咁叫等等,到姑娘搞掂新到病人,又睇吓12床做乜事?原來賴晒屎,兩個又搞餐C,之後才離開.
離開後到新來個呀伯,一來到又猛揾姑娘,總之全部都要揾姑娘?直至0044個96歲呀伯,才推過我後便間房,上正式床,我才開始瞓.
2022年12月25日 星期日
(威院一日)高危房12樓A9,無啖好食,三隻麵包,
2022/12/25 星期日 晴
昨成晚等候區坐輪椅,坐到腰都直,通宵未瞓過,去到0755早餐到,麥皮同件三文治,水一樣的麥皮,麵包夾芝士好過無?枱都無張夾硬拿住食,填填個肚.
突然有人同我講?你可以上病房啦?就係咁推咗我上12樓A9房,趟趟閘門趟趟開,開度關度,拾足障礙賽,間房大約2,3百尺?本應4床一間房,卻迫到5張病床,簡直困獸鬥,無病都變有病.
心諗個人一點病徵都無?只係氣喘?問句姑娘大約幾時會出院?姑娘好驚訝說?你剛入院咋,但我唔覺有事啵?佢話你氣喘兩度呀?聽見咁講都不用諗出院.
於是早點call老婆,帶些日用品來,最緊要買幾隻麵包過我.
收線後電話要义電,諗住問聲姑娘插電制?諗吓都係唔問好?唔比再算.
4點多鐘,有個醫生入來,又唔同醫生?唯一相同的,個個都係後生仔?佢話哮喘又新冠,要食新藥瑞德西韋,跟住聽筒幫我聽背後,話我哮喘.
離開無耐護士入來派藥,我就一包吊針藥水,同一粒去水藥丸,先食粒藥丸,跟住吊包藥水,問佢係咪瑞德西韋,佢話係新冠藥水,靴靴聲好快成包藥水落晒,
粒去水丸犀利,係咁不停柯尿?響床度除褲丘褲真麻煩.
1758又晚飯,五個病人,著四個不能自理,一個重係痙攣要綁住,不能說話,全日不論瞓與不瞓,48小時都係𠲖𠲖吔吔,一個成91歲耳又聾,唔係瞓覺就手機,不過姑娘頻頻要幫佢執手機,瞓著跌手機呀,三個不能自理要餵,痙攣個食相更加得人驚?唉!重邊有食慾吖,草草爬兩粒我都收工.
爬兩粒後又埋頭手機寫我Blog,1958姑娘派藥,還以為新藥,望真啲原來舊有心臟藥,還有類固醇噴劑,先前千方百計去揾類固醇,竟然要打999才有,真係人算不如天算,以為偷偷地影張留念,誰知姑娘發覺,以為唔比影啦?點知走埋嚟幫手拿起讓我影,我話唔係醫院唔比影咩?佢話影藥無問題.
2022年12月24日 星期六
氣喘類固醇,個仔假BBQ,快測見微紅,三口取消BBQ,晚飯3人食,確診999,威院.
2022/12/24 星期六 晴 17C
去到夜晚瞓前又氣喘,噴類固醇都唔掂,2247再來做測試,今鋪清清楚楚條紅線?今鋪大鑊確診兼氣喘,諗吓咁情況都係打999call白車.
昨晚臨開飯,突然全身好凍?都知不妙,嗱淋開定張電氈,食完飯擦埋幾隻牙仔,嗱淋走上床瞓,占寒占凍.
一覺兩點鐘,氣喘到?好辛苦嗱淋吸兩口類固醇,慢慢才平服返,就咁縮吓縮吓瞓到天光0717醒,手機賴床.
9點鐘起床,個仔放假,一家大細買外賣早餐,我都嗱淋食埋早餐,退位讓給他們食.
1110三口子出門BBQ,昨晚咁情況?諗落有點唔妥?嗱淋做個快測,叫埋老婆做,果然中招,不過紅線不明顯,好矇一條紅線,老婆就全無事,見咁情況嗱淋通知個仔三口子,個仔去到放下BBQ料,立即返來,若中招無謂累人.
我就一個小時後再測一次,同樣好矇一條紅線,都諗住佢會慢慢消失?
2033老婆煮開飯,我就唔開胃煲碗白粥過我,3個人食.
999call白車
一路通住電話等白車,好快就來了兩個消防醫護員,來到好細心問過情況,跟住白車到,老婆跟車聞住飬氣我,咁就車咗去威院.
威院急診有分類,確診另外一個大房,當時大約有12個病人,兩個醫護助理柱守,醫生護士久不久過來跟進病人,
有些家屬病人等得唔內煩,問個醫護助理幾時醫生到,助理就係咁解釋,醫生護士有佢哋工作程序我哋係唔知㗎.
大約12點多啲鐘醫生來同我檢查,話過情況佢知,聽過上身各處,話等陣會有姑娘同你種粒豆仔,方便輸送藥物,去到12點半鐘怕無車,老婆要走.
0340護士來種豆仔,中妥豆仔,即時抽出幾小筒血,再做埋個心電圖.
又到0424剛才睇我位醫生到,在我粒豆注入兩筒藥水,好奇問佢係乜藥水?話係抗生素同類固醇喎?
(大概檢查出我呼吸系統大問題).
又到4點幾鐘助理護推我去照X光,沿途好靜一個人都無,去到X光房,一個人等咗成廿分鐘多?才有個女X光師到,好奇怪問我有無打疫苗?我話無,但佢又無問我點解?好想問佢點解咁問,後來都係無,好快照咗張肺部,個X光師話等陣會有人推你回去.
等咗好一陣急症個助理到,問我照咗X未?然後推我回急診等候區,又繼續等上房.
2022年12月19日 星期一
睇波,睡可,天氣寒冷,個仔假,氣喘踩轉長廊 ,兩餸飯,晚飯5人食.
2022/12/19 星期一 晴 13C
昨晚世界杯決賽,11點鐘直播法國對阿根廷,飯後睇陣電視就開波,阿根庭廷兩球領先已為贏啦,誰知法國入番兩球,加時下半場阿根廷1球領先,以為捧硬杯啦,誰知又追平?12碼才阿根廷勝,結果成兩點幾鐘才瞓.
一覺今早0737醒,收音機賴床,0855新抱B出門返學,我才起來,氣温13C好似無昨日咁凍?如常烚水搞早餐,0926早餐,老婆才蒲頭.
餐後辦埋件事又11點鐘,才發覺個仔放假,新抱返1150兩公婆齊去接B放學.
1230三口子返,攰攰哋我都入房攤床瞌陣,1點多鐘醒,見都好多天無踩單車?於是乎走去踩番轉.
1402起步,真大鑊?唔知心臟定氣管,踩來氣喘?踩得好辛苦?1430踩到來孖橋,都係咪搞?就孖橋休息陣,坐咗陣繼續踩去長廊.
1443來到長廊第個二亭,氣喘如牛下,坐下係咁扯氣.
老婆到話上惠康?唉!我唔行得?你自己上.老婆下來後就齊齊街市,還是我坐老婆買,惠康買有牛肉25蚊,三文魚28蚊烏雞34蚊,街市就買三樣菜20蚊,蕃茄20蚊,豬展32蚊同紹菜5蚊,兩餸飯27蚊返歸.
回家1637我都開餐,老婆問惠康有包紅色嘢?我話無見過啵?睇吓張單少咗樣嘢,佢才返回惠康問問?飯後老婆返,果然漏咗響惠康.
飯後我都早點沖涼,1720個仔抱住個B返,個B瞓到淋冧稔,跟住新抱返,我就入房拉床開工,寫我今日blog.
2022開飯5個人食,個仔沖涼留湯飯餸.
2022年11月14日 星期一
生涯(22)友聯船廠20/11/1982~19/12/1982
17/11/1982恆勝結業遣散,期間我個仔亦告出世,一家4口手停口停,迫切要工作,仕急馬行田,乜工作都要做,就太古老友肥佳介紹,三日後到長沙灣一船廠開工,重操故業木工.
係間左派背景友聯船廠,從事維修船隻工作,維修海面拋泡的貨船,俗稱開河,開工要坐公司船,車出大海碇泊區,上船維修工作.
散工日薪100元,就係咁做咗一個月就玩完.
一個月生涯感覺
黑暗刻薄,凡差不多做滿一個就炒,然後過兩日須要就請番你,勞工例不足一個月,無須通知,無須代通知金,乾淨俐落.
亞洲運動會
當年最記得就係新德里亞運,做我們船這一行,大部份人都帶有耳筒收音機,一路工作一路聽,就係嗰年嗰月?印度搞亞運,聽足我一個月,亞運完我份工亦告玩完.
2022年11月8日 星期二
生涯(21)1981搬屋篇(沙田)白田四區.
17/11/1982離開恒勝建築公司,禾富地盤期間,我們搬了屋,由灣仔霎西街搬到來沙田,白田村第四區168號,一間石屋,入住冇耐我個仔亦告出世.
石屋第一手業主係鄧寄塵,我們以6萬幾元買入,鄉公所做証明才知道第一手係鄧寄塵,又聽街坊講嗰時山下政府收地,這裡地段是補償給他的,又話好多知名人仕,都有補地上來,聽講李香琴都有份補上來喎?
石屋都好大間吓,好企理,兩層高磚屋,波浪坑瓦蓋頂,二樓間有兩間房,我同大佬兩家各住一間,父母住地下,還有個廳,廚房有自來水,煮食就要叫送石油氣.
屋就肆正,夠光猛清潔夠靜,為獨交通就差些,屋在半山,返工返學買餸要落山,落到山腳便是城門河源頭,沿城河行出去便是美林邨,亦是大圍市區,大約要行廿多分鐘,村車亦有,日間行駛,就在石屋行上不遠,班次就梳些,係劉萬利載人貨車,通常行好過等,係回程好多時乘搭吓.
門前走廊還有些少地方,可種些植物,大佬同呀嫂種有躝藤勒杜鵑,開花時一偏紅當盪,瓜類涼瓜節瓜都過種有,節瓜種出好大個,十足冬瓜仔一樣,
種有木瓜樹,長得很高,可惜未曾有結過果?大佬還做有個魚池仔,養有金魚,閒來還可以BBQ燒嘢食,中秋節可玩吓燈籠,搞搞氣氛.又曾經飬過隻狗,叫黑仔,由於踐踏人家農作物,被鄰居投訴,無奈綁在屋後,甚少放出來?有次一放出來,嘩?狂卉到舞雷公遠?後來終於回來,由於太麻煩,冇耐大佬滾兩滾落咗肚lu.
屋後有棵好大龍眼樹,有龍眼不過好薄肉(雞眼),而廁所就無,開大要去公廁,就在屋後龍眼樹後便間公廁,係個旱踎廁,屎坑蟲躝吓躝吓,躝到腳位,嘩!好恐怖.
一住就兩年多,期間難忘的記得的
海鷗box相機
老爺海鷗box相機,比個仔玩,衰仔玩兩玩,相機有條彈弓,不知何故彈咗出來?鈎到隻眼,衰仔揞住係咁喊?見有些血?心諗喱鋪大鑊?嗱淋抱佢落山去醫院,行出大斜路不久,見佢鬆開手,一望無事,才鬆口氣返歸.
正牌衰仔
有日衰仔在廳玩,被自己部單車砸住,係咁喊救,於是乎將單車移走,誰知個衰仔係都要揾媽咪?要原封單車砸回自己?係要佢媽咪拿走才算,吹漲?
樑上君子
個女讀緊幼稚園高班,幼稚園就在大圍明星酒樓後便,老婆天天接送放學,有日接放學,衰女竟然做樑上君子?褸內藏掛滿玩具?出校門時被老師全部繳械.
唐狗呀才
有日黃昏放工返,以經做到人都累,行到來大斜路,不遠便回到家,大斜路有隻狗叫呀才,人人話佢好稔善,當我上到來,佢就趴響大斜路右邊坑渠邊,我都醒目,佢在右邊,我就行左邊而上,唉!當我行過佢後,冷不提防,佢竟然靜雞雞兜個彎,從後咬我一口?咬口我右後大髀?我就大喝一聲喝走佢?才發覺有血,嗱淋返歸,立即清水係咁沖洗傷口,又撳又摙又唧?洗後兩隻牙0隆.
翌日嗱淋去找狗主,問隻狗有無打針?有無病?結果後來無事.
打風
個風好勁,住山上咪話唔驚?嗰晚有得震無得瞓,風過後,屋後棵龍眼樹被打斷,好彩瞓另邊,無壓到間屋?其他所見處處斷樹,嗱淋將斷枝移走,免得別家以為這裡放垃圾,堆滿屋後.
電壓
有日發覺電唔尋常,光管特別光,睇住慢慢溶?結果翌日電燈公司話,變壓器壞喎?條村好多戶雪柜雪器,通通燒壞晒,我家就損失幾支光管.
有蛇
有日有條蛇在屋外,於是拿條樹枝去打C佢,好失敗眼白白都打佢唔中,逃之夭夭,翌日呀嫂買來硫磺灑滿屋邊.
嚇Q死
住山上好少夜歸,夜歸要踱路上,有日工作關係,夜至11點幾才返歸,老總算唔話得,車到我到城門河盡頭,讓我山腳行回家,山路窄窄,兩傍村屋,有大有細,迂迴曲折,村燈暗暗,行咗3份1路,兩傍還是較大屋宅,遠遠暗暗燈光下,見有穿著白袍女子,企響屋門外?心諗是人還是鬼?大佬咁夜整啲咁嘢我玩?要強行經過只不過幾尺,觀察咗好一陣,她媽的?原來午夜放狗,咪嚇我啦.
訂閱：
文章 (Atom)