11月15日(三)睡好有夢,頭昏比昨好得多,個女到篤B功課,茶大家樂,晚飯5個人食,飯後馬贏13.5蚊.

2023/11/15   星期三   晴   22C

昨晚12點鐘前瞓,夜所一劑就今早0722醒,有點夢但好瞓,手機賴床,0843起來.

新抱B正在出門上學,我頭已經無咁昏,同昨日差得遠,如常烚水搞早餐,0932早餐.

餐後辦埋件極暢快事,睇電視,睇完集倚天1130,稍後嫲嫲出門接B放學,我就攤床煲劇九義人,一煲1220廿四集終於大結局,剛好嫲嫲接B返,原來姑媽一同接B返,嫲嫲回來就處理佢午餐,個B又要食煎蛋,1302老婆開餐,個B食煎蛋,衰豬食過唔夠喉,姑媽又入廚煎過兩隻,兩個人食.

餐後姑媽篤B做功課,我就入房攤床瞌番陣.

去到成3點半有多,才齊齊出街下午茶,到大家樂問衰豬食乜?食飯喎?咁就大家樂,要兩個餐加杯熱檸水,合共76蚊,衰豬未食就要我部手機.

吃過坐夠,星期三上惠康,上到二樓衰豬又話要買畫薄,嫲嫲買本24蚊過佢,出來遇見朱太又聊兩句,惠康買有橄欖油兩樽178.5蚊,雞蛋兩排48.6蚊,廚紙兩包44蚊同蝶絲粉10.5蚊走人,街市老婆買菜20蚊,蕃茄12蚊同瘦肉23蚊,買完餸個B係都要瀡吓滑梯才返歸.

回家1749個仔已回來,我都嗱淋沖涼,涼後新抱返,我都入房睇電視,睇陣新聞馬又開跑,踱吓馬都係唔識賭?見騎師王潘頓有2.4倍,不如買10蚊玩吓?又睇吓能否有收錢?

2121開飯5個人食.

馬跑完,買咗10蚊雞,又比我攞番個彩,贏13.5蚊開心吓.