睡來唔錯,血壓高,膝痛消炎藥,游水800m,大圍拮嘢兼買餸,晚飯三人食.

昨晚12點前都瞓,瞓落床好唔掂,右膝內則扯住痛,見還有塊701跌打膏布,貼埋佢再算,貼後一覺瞓到今晨6點鐘醒,老婆在返工,瞓不返笠個耳筒,半瞓下到7點多,聽收音機賴床,凍凍哋唔願起身,到差不多10點鐘才起來,腳還戚住戚住痛.
煲點水洗面搞早餐食,餐後量血壓140/81-56,食過今早藥,見腳痛咗成日未見好,都係食粒消炎藥,辦埋個大事11點鐘,有點不憤氣,再量血壓144/77-58重衰.
上輪網又12點半鐘,關機看電視,谷鬼氣再量次151/77-54,唉!怕咗你唔再量,看電視到1點多鐘,見腳無咁痛,執嘢去游水.
1點37分過到泳池,更衣室熱身,上池1點53分下水,泳客相當多吓,可能新的來舊的未走,水有點凍,游佢50才開始無咁凍.一條氣游到500m,大鑊左邊耳塞甩咗,頭噩噩揾唔返,又好彩番轉頭又揾番.
一條氣游夠800m算數走人.
返回更衣室,沖完個涼同呀王吹水,呀王話比條伯父吹漲,佢話條伯父鬼咁多衫,塞到儲物柜爆,走咗去沖涼,條伯父啲衫跌咗落地,條伯父沖完涼,話呀王整跌佢啲衫,伯父蠻不講理,氣得有怨無路訴,唉!啲老野以老賣老,好多時有理說不通,咁好講佢,全香港人都係咁,包刮我個仔都係,唉!啱就啱,唔啱就無謂再講.
話咁快又3點多啲鐘,老婆來電,就大圍食嘢兼買餸,過到大圍拮嘢,老婆以經在等,還是每人食個飯餐,老婆試新嘢,薯蓉雞絲飯21蚊,我就豚肉飯20蚊.
 
吃後坐陣就買餸,行轉街市買有木瓜一隻7蚊,蘿蔔兩條5蚊芝士兩包26.8蚊,干葱2蚊,瘦肉10蚊,就分頭回家,老婆火車我踩車,返回家樓下五金鋪買樽白膠漿13蚊回家.

回家5點半鐘,無耐老婆返到,又買佢喜歡柿干18蚊,去核紅棗20蚊.

回家老婆處理菜料,我就上網寫blog,游完水實在太累,頂不順下梳化恰陣,在恰其間,個仔放工返,有人唔食喎?為有又轉轉,菜料有紫菜7蚊,南瓜同芋頭約5蚊,瘦肉10蚊,排骨12.5蚊,三文魚頭半個12.5蚊.




南瓜芋頭炆排骨.

辣煎三文魚頭.

瘦肉滾紫菜.

三個人食,今餐盛惠47蚊.